Ադրբեջանի կողմից հնչող պատերազմական սպառնալիքները հեռանկար չունեն․ Փաշինյան

• 22.09.2018, 09:46
•  Տարածաշրջան,  Աշխարհ

ՀՀ վարչապետ Նիկոլ Փաշինյանը սեպտեմբերի 21-ին Հայաստանի Հանրապետության անկախույան 27-րդ տարեդարձի առիթով տոնական ընդունելություն է հրավիրել, որի ընթացքում դիմել է ուղերձով։

Իր ելույթում նա նշել է․ «Մեր արտաքին քաղաքական ամենակարևոր հիմնախնդիրը Արցախի հարցի խաղաղ կարգավորումն է։ Մեր դիրքորոշումը չի փոխվել։ Մենք կողմ ենք խնդրի բացառապես խաղաղ կարգավորմանը և անելու ենք մեզանից կախված ամեն ինչ՝ հարցը բանակցային ճանապարհով լուծելու համար։ Ադրբեջանի կողմից հնչող պատերազմական սպառնալիքները չունեն որևէ հեռանկար. ենթադրել, թե մենք վախենալու ենք այդ սպառնալիքներից և բավարարելու ենք Ադրբեջանի առավելապաշտական նկրտումները, սին են։ Այո, մենք կառուցում ենք խաղաղասեր, ժողովրդավար և մարդասիրական գաղափարներ դավանող պետություն, բայց դա չի նշանակում, թե մենք չենք պատրաստվում պաշտպանել մեզ, մեր հայրենիքը, մեր ապագան»։

Նա ընդգծել է, որ «Արտաքին քաղաքական ոլորտում մենք աշխատում ենք, որպեսզի մեր բոլոր միջազգային գործընկերների համար հասկանալի լինի Հայաստանում տեղի ունեցող իրադարձությունների իրական բովանդակությունը»: Վարչապետը ևս մեկ անգամ շեշտել է,  որ Հայաստանի արտաքին քաղաքականության մեջ շրջադարձեր չեն լինելու:

«Մեր գլխավոր ռազմավարական դաշնակիցը Ռուսաստանի Դաշնությունն է, որի հետ մենք կապված ենք բազում և դարավոր կապերով։ Մենք մտադիր ենք էլ ավելի խորացնել մեր համագործակցությունը Ռուսաստանի հետ թե՛ երկկողմ, թե՛ բազմակողմ ձևաչափերում։ Մենք նաև զարգացնելու ենք մեր հարաբերությունները Եվրոպական միության, ԱՄՆ-ի հետ, ինչպես նաև մեր անմիջական հարևանների՝ Վրաստանի և Իրանի հետ»,- հավելել է Փաշինյանը։