Ռեալ չէ մայիսից շուտ արտահերթ ընտրությունների գնալը, բայց ամեն ինչ այսօր գտնվում է վարչապետի դաշտում. Շարմազանով

• 03.10.2018, 14:48
•  Աշխարհ,  Հայաստան

Ինձ համար ռեալ չէ մայիսից շուտ արտահերթ խորհրդարանական ընտրությունների գնալը, բայց ամեն ինչ այսօր գտնվում է վարչապետի դաշտում, և եթե նա հրաժարական է տալիս, գնում են համապատասխան զարգացումներ: Այս մասին, այսօր՝ հոկտեմբերի 3-ին, ԱԺ-ում լրագրողների հետ զրույցում նշել է ԱԺ փոխնախագահ, ՀՀԿ մամուլի խոսնակ Էդուարդ Շարմազանովը, փոխանցում է News.am-ը: 

«Մի բան ինձ համար պարզ չի, ի՞նչ փոխվեց այս 20 օրում, որ 25 օր առաջ վարչապետն ասում է, որ ընտրությունները պետք է լինեն մայիս-հունիսին, իսկ հիմա ասում է՝ պետք է լինեն դեկտեմբերին: Գնացեք վարչապետին հարցրեք, թե ինչու է մայիս-հունիսին ընտրություններ անցկացնելն իրեն անհանգստացնում»,- ասել է նա:

Շարմազանովը հիշեցրել է, որ վարչապետ Նիկոլ Փաշինյանը կառավարության ծրագիրը ներկայացնելիս հայտարարել էր, որ պետք է ժամանակ անցնի, որ քաղաքական ուժերը պատրաստվեն ընտրությունների, իսկ երեկ ասում էր, որ պետք է ընտրությունները լինեն դեկտեմբերին: «Ես վարչապետից չեմ լսել որևէ հիմնավորում, թե ինչու պետք է ընտրությունները լինեն դեկտեմբերին, այլ ոչ հունվարին, փետրվարին կամ նոյեմբերին ու սա է մտահոգիչը: Մյուս կողմից, Ազգային ժողովը, անկախ նրանից, թե վարչապետի կողքը քանի մարդ է կանգնած, ըստ Սահմանադրության օրենսդիր մարմինն է, ու չի կարելի սպառնալիքներով ու ճնշումներով միջամտել ԱԺ աշխատանքներին»,-ընդգծել է նա: