Փաշինյանը պարզաբանել է, թե ում նախաձեռնությամբ է հայաստանյան առաքելությունը Սիրիա մեկնում

• 13.11.2018, 16:12
•  Մերձավոր Արևելք,  Աշխարհ,  Հայաստան

Yerevan.Today

Սիրիայի հետ կապված` ՀՀ քաղաքականության նպատակն է աջակցել սիրիահայ համայնքին: Այսօր` նոյեմբերի 13-ին, Ազգային ժողովում պատասխանելով ԱԺ ՀՀԿ խմբակցության պատգամավոր, ՀՀԿ փոխնախագահ Արմեն Աշոտյանի հարցին` այս մասին ասել է ՀՀ վարչապետի պաշտոնակատար Նիկոլ Փաշինյանը, երբ պատգամավորը հետաքրքրվել է` Սիրիայում առաքելություն իրականացնելը ՀՀ կառավարության նախաձեռնությո՞ւնն էր, թե՞ այդ հարցով Հայաստանին դիմել էր ռազմավարական գործընկեր Ռուսաստանը, հայտնում է Սպուտնիկ Արմենիան: 

«Մեր նպատակն է աջակցել, որ մեր հայրենակիցները վերադառնան խաղաղ կյանքի: Դա բացառապես հումանիտար առաքելություն է, ոչ մի ռազմական ուղղվածություն չունի, և այդ ծրագիրը մենք կիրականացնենք ՀՀ բյուջեով նախատեսված միջոցների շրջանակում»,- ասել է Փաշինյանը:

Առաքելության նպատակը, ըստ Փաշինյանի ձևակերպվել է Սիրիայի հայ համայնքի հետ, բայց նաև այդ ընթացքում ՌԴ-ի հետ որոշակի բանակցություններ են վարել:

«Մենք հարց ենք դրել` քանի որ Սիրիայում իրավիճակը փոխվել է և փոխվում է, պետք է խաղաղ կյանքի պատրաստվի նաև Հալեպի մեր համայնքը, ծագել է գաղափար, որ մենք էլ մեր ներդրումն ունենանք հալեպահայության համար խաղաղ կյանքի դաշտ ստեղծելու գործում»,- ասաց Փաշինյանը:

Վարչապետի պաշտոնակատարը շեշտել է` թեև կային մտավախություններ, որ Հայաստանի այս քայլը այլ մեկնաբանության կարժանանա արտերկրի գործընկերների կողմից, բայց բոլոր գործընկերները, նրա խոսքով, ըմբռնումով են մոտենում Հայաստանի առաքելությանը: