Քիմ Քարդաշյանն ու Շեր Սարգսյանը ցանկանում են միասին Հայաստան գալ

• 26.11.2018, 17:49
•  Ամերիկա,  Աշխարհ,  Հայաստան,  Սփյուռք

Ռեալիթի շոուի ամերիկահայ աստղ Քիմ Քարդաշյանն ու լեգենդար փոփ երգչուհի Շերը (Շերլին Սարգսյան) որոշել են միասին Հայաստան գալ։ Այս մասին հայտնի է դարձել «Քարդաշյանների ընտանիքը» ռեալիթի շոուի հերթական դրվագի ցուցադրությունից հետո, հայտնում է Սպուտնիկ Արմենիան: 

Հեռուստաաստղն իր ընկերուհիների հետ գնացել է Շերի համերգին, որը կայացել է Լաս Վեգասում։ Ելույթից հետո օսկարակիր հայուհին միացել է Քարդաշյանին։

«Այն ամենը, ինչ արել եք հայ համայնքի համար, հզոր է», - ասել է Քարդաշյանը երգչուհուն։

Նրանք հիշել են իրենց հայաստանյան այցելությունները և ևս մեկ անգամ պատմական հայրենիք այցելելու ցանկություն հայտնել։

«Մենք պարտավոր ենք գնալ այնտեղ։ Շատ եմ ուզում գնալ։ Ինձ համար դա պարզապես անհրաժեշտություն է», – խոստովանել է Շերը։

Քիմը խոստացել է առաջին իսկ հնարավորության դեպքում ընկերակցել Շերին։