Թուրքիայում մտադիր չեն առանց նախապայմանների հարաբերություն հաստատել Հայաստանի հետ. հայտարարություն

• 11.12.2018, 19:33
•  Աշխարհ,  Հայաստան

«Թուրքիայի հետ հարաբերությունները կարգավորելու համար Հայաստանը նախևառաջ պետք է դուրս գա ադրբեջանական օկուպացված  հողերից», - գրում է ադրբեջանական «Trend» լրատվական գործակալությունը` նշելով, որ այս մասին հայտնել են Թուրքիայի նախագահականից՝ ի պատասխան իրենց հարցմանը, փոխանցում է Ermenihaber-ը: 

Ադրբեջանական կողմը նման հարցում էր արել Թուրքիայի նախագահականին այն բանի կապակցությամբ, որ Հայաստանում տեղի ունեցած արտահերթ խորհրդարանական ընտրություններից հետո վարչապետի պաշտոնակատար Նիկոլ Փաշնինյանը լրագրողների հետ զրույցում հայտնել էր, թե Երևանը պատրաստ է դիվանագիտական հարաբերություններ հաստատել Անկարայի հետ՝ առանց ղարաբաղյան հարցում նախապայմանների։

«Թուրքիան կողմնակից է, որ տարածաշրջանում տիրի կայունություն և խաղաղաղություն, իսկ առանց ադրբեջանական հողերի ազատագրման հնարավոր չէ դրանց հասնել»,- ասվել է Թուրքիայի նախագահականի հայտարարության մեջ։

Ընդգծվել է, որ հայ-թուրքական հարաբերությունների կարգավորման համար Հայաստանը պետք է հրաժարվի Հայոց ցեղասպանության հարցում Թուրքիային ուղղված պահանջներից։