Մարտի 23-ին մտադիր ենք Հայաստանում հեղափոխական մասշտաբների շաբաթօրյակ իրականացնել. Փաշինյան

• 11.02.2019, 14:27
•  Աշխարհ,  Հայաստան

Մենք նախաձեռնությամբ ենք հանդես եկել և մարտի 23-ին մտադիր ենք ՀՀ-ում իրականացնել հեղափոխական մասշտաբների շաբաթօրյակ: Այս մասին այսօր համայնքների ղեկավարների հետ հանդիպմանն ասել է ՀՀ վարչապետ Նիկոլ Փաշինյանը, հայտնում է Tert.am-ը:

«Ես մի անգամ ասել եմ, որ ՀՀ-ում էական, լրջագույն փոփոխություններ կլինեն այն ժամանակ, երբ մեզ կհաջողվի Հայաստանը մաքրել աղբից: Իհարկե, առաջին անգամ չէ, որ նման ծրագիր իրականացվում է:

2-3 տարի առաջ կառավարությունն իրականացրեց «Մաքուր Հայաստան» ծրագիրը, որը շատ լավ գաղափար էր, բայց մենք հիմա պետք է փորձենք չկրկնել այն սխալները, որոնք այս ծրագրի համատեքստում արել են»,- հայտնել է վարչապետը:

Նիկոլ Փաշինյանը նշել է, որ նախորդ տարի իրականացրած քայլարշավի ընթացքում նկատել են «Մաքուր Հայաստանի» բացթողումները, մասնավորապես այն, որ աղբը մեկ տեղից տեղափոխվել է մեկ այլ տեղ: