ԵՐԵՎԱՆ 21 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 29 746,21 դրամ ԱՐԾԱԹ - 379,24 դրամ ՊԼԱՏԻՆ - 13 702,61 դրամ

Թրամփ-Կիմ Չեն Ին գագաթաժողով. կողմերը հայտնվել են փակուղում

Reuters

Վիետնամի մայրաքաղաք Հանոյում ավարտվեց ԱՄՆ նախագահ Դոնալդ Թրամփի և Հյուսիսային Կորեայի առաջնորդ Կիմ Չեն Ինի թվով երկրորդ գագաթաժողովը: Չնայած կողմերը նշում են, որ բանակցություններն անցել են բավականին լավ, կառուցողական մթնոլորտում, այնուամենայնիվ, դրանց արդյունքում նախատեսված փաստաթղթերը չստորագրվեցին: Ավելին, բանակցություններն ավարտվեցին ծրագրվածից շուտ. վերջին պահին չեղարկվեց Թրամփի և Կիմ Չեն Ինի համատեղ ճաշը:

Ավելի ուշ կայացած մամուլի ասուլիսի ժամանակ Թրամփը հայտարարել է, որ փաստաթուղթը չի ստորագրվել, քանի որ Փհենյանը ցանկացել է Յոնբենի միջուկային օբյեկտի ապամոնտաժման դիմաց բոլոր պատժամիջոցների չեղարկում: Թրամփի խոսքերով` պայմանավորվածությունների բացակայությունը երկկողմ որոշում է: Միևնույն ժամանակ նա նշել է, որ Կիմ Չեն Ինը խոստացել է այլևս միջուկային և հրթիռային փորձարկումներ չիրականացնել:

Հյուսիսային Կորեայի առաջնորդը, կարծես թե, անկեղծ է ապամիջուկայնացում իրականացնելու իր մտադրությունում, սակայն այդ ուղղությամբ ակտիվ գործնական քայլերի չի գնում ԱՄՆ նկատմամբ ունեցած անվստահության պատճառով: Հիշեցնենք, որ Իրանի միջուկային գործարքից ԱՄՆ դուրս գալու մասին Թրամփի որոշումից հետո սա կողմերի առաջին հանդիպումն է, և այն, ի տարբերություն նախորդ երկուսի, այդքան էլ արդյունավետ չէր: Փհենյանում կարծես թե վստահ չեն, որ ԱՄՆ-ը կպահպանի իրենց հետ պայմանավորվածությունները: Վերջին ամիսներին Փհենյանը բազմիցս հայտարարել է, որ ապամիջուկայնացման հարցում նոր քայլեր ձեռնարկելու համար ակնկալում է նախ ԱՄՆ կողմից որոշակի պատժամիջոցների չեղարկում: Վաշինգտոնն իր հերթին կտրականապես մերժում է որևէ պատժամիջոցի չեղարկում մինչև Կորեական թերակղզու լիակատար ապամիջուկայնացումը:

Հանոյի բանակցությունները ցույց են տալիս, որ կողմերը հայտնվել են որոշակի փակուղային իրավիճակում: Մի կողմից, երկուսի մոտ էլ մեծ ցանկություն կա՝ վերջ դնելու Կորեական թերակղզու միջուկայնացմանը. Թրամփի համար կարևոր է 2020 թվականի նախագահական ընտրություններից առաջ արտաքին քաղաքականությունում ունենալ հաջողության պատմություն` հատկապես Իրանի միջուկային գործարքից դուրս գալու, Սիրիայում և Աֆղանստանում առնվազն առերևույթ պարտվողական քաղաքականության, Վենեսուելայում տեղի ունեցող զարգացումների ֆոնին: Հյուսիսային Կորեայի համար միջազգային և հատկապես տնտեսական շրջափակումը դառնում է անտանելի, այդկերպ շարունակվելու դեպքում չի բացառվում, որ մոտ ապագայում երկրում  մարդասիրական աղետ սկսվի: Մյուս կողմից կա որոշակի անվստահության մթնոլորտ` ավելի վճռական գործողությունների դիմելու համար:

Հաշվի առնելով այս ամենը` ենթադրվում է, որ առաջիկայում Վաշինգտոնն ու Փհենյանը դեռ կշարունակեն քաղաքական խորհրդակցությունները, սակայն հավանականություն փոքր է, որ դրանք լուրջ արդյունքներ կտան: Այս մասին է վկայում նաև Կիմ Չեն Ինի հետ հաջորդ գագաթաժողովի բավականին մշուշտ լինելու մասին Թրամփի հայտարարությունը:  


Ամենաընթերցվածը

օրվա

շաբաթվա

ամսվա

Եղանակ
Երևան
Մասամբ ամպամած
Խոնավություն՝ 45%
Քամի՝ 8 կմ/ժ
21 C°
 
16°  27° 
27.09.2020
15°  27° 
28.09.2020
Հարցում

Բավարարվա՞ծ եք Ամուլսարի հարցում Հայաստանի իշխանությունների դիրքորոշումից: