Իրաքի մշակույթի նախարարը կարևորել է Բաբելոնի մշակութային փառատոնին Հայաստանի մասնակցության վերականգնումը

• 05.03.2019, 21:55
•  Մերձավոր Արևելք,  Աշխարհ,  Հայաստան

Մարտի 4-ին Իրաքում ՀՀ դեսպան Հրաչյա Փոլադյանը հանդիպեց Իրաքի մշակույթի, զբոսաշրջության և հուշարձանների նախարար Աբդուլամիր ալ-Համադանիին (Abdulameer al-Hamdani)։ Հանդիպման ընթացքում դեսպան Փոլադյանը նախարար ալ-Համդանիին շնորհավորեց պաշտոնի նշանակման կապակցությամբ՝ մաղթելով արգասաբեր գործունեություն։

Ինչպես տեղեկացնում են ՀՀ ԱԳՆ մամուլի ծառայությունից` կողմերն անդրադարձան հայ-իրաքյան երկկողմ հարաբերություններում առկա մշակութային համագործակցության օրակարգին, մասնավորապես՝ դեսպան Փոլադյանը մատնանշեց հայ-իրաքյան միջկառավարական հանձնաժողովի երևանյան 2-րդ նիստի ընթացքում արդեն իսկ առկա ձեռքբերված պայմանավորվածություների և դրույթների կյանքի կոչելու անհրաժեշտությունը։ Անդադարձ կատարվեց նաև Հայաստանի և Իրաքի մշակութային օրերի փոխադարձ անցկացմանը, ինչին իրաքյան կողմի արձագանքն ընդգծված դրական էր, և կողմերը պայմանավորվեցին կոնկրետ քայլեր ձեռնարկել այդ նախաձեռնության իրականացման ուղղությամբ։

Հայ-իրաքյան մշակութային ոլորտի զարգացման համար որպես բաղկացուցիչ տարր ընդգծվեց նաև փոխադարձաբար բազմատեսակ փառատոններին մասնակցությունը, որը նոր խթան կհանդիսանա երկկողմ հարաբերությունների առաջընթացի համար։ Նախարար ալ-Համդանին շեշտեց Բաբելոնի միջազգային մշակութային փառատոնին Հայաստանի մասնակցությունը վերականգնելու հնարավորությունը։