Թուրքիան թույլ չի տա Իսրայելի ներխուժումը Գոլանի բարձունքներ. Էրդողան

• 22.03.2019, 16:27
•  Ամերիկա,  Տարածաշրջան,  Աշխարհ

Ekathimerini

ԱՄՆ նախագահի հայտարարությունն առ այն, որ արդեն ժամանակն է  ճանաչել Իսրայելի ինքնիշխանությունը Գոլանի բարձունքների հանդեպ, տարածաշրջանը նոր ճգնաժամի առջև է կանգնեցնում: Այս մասին ասել է Թուրքիայի նախագահ Ռեջեփ Էրդողանը՝ Ստամբուլում ելույթ ունենալով Իսլամական համագործակցություն կազմակերպության արտահերթ նստաշրջանում, հայտնում է Reuters-ը: 

Նրա խոսքով՝ Թուրքիան երբեք թույլ չի տա Գոլանի բարձունքներ Իսրայելի ներխուժման լեգիտիմացումը։

Ավելի վաղ ԱՄՆ նախագահ Դոնալդ Թրամփը հայտարարել էր, որ «52 տարի հետո եկել է ժամանակը ճանաչելու Իսրայելի ինքնիշխանությունը Գոլանի բարձունքների հանդեպ»։

«Դա չափազանց կարևոր ռազմավարական նշանակություն ունի Իսրայելի պետության անվտանգության և տարածաշրջանային կայունության համար»,- գրել է Թրամփը թվիթերում: 

Նշենք, որ Գոլանի բարձունքները վիճելի տարածք է Մերձավոր Արևելքում։ Դրա մեծ մասը ներկայում վերահսկում է Իսրայելը, իսկ արևելյան հատվածը՝ Սիրիան։ Ինչպես Իսրայելը, այնպես էլ Սիրիան Գոլանի բարձունքներն իրենց տարածքի մաս են համարում։