ՄԻԵԴ-ը հրապարակել է «Լևոն Տեր-Պետրոսյանն ընդդեմ Հայաստանի» գործով վճիռը

• 25.04.2019, 18:05
•  Եվրոպա,  Աշխարհ,  Հայաստան

Lragir.am

Մարդու իրավունքների եվրոպական դատարանը հրապարակել է Հայաստանի առաջին նախագահ Լևոն Տեր-Պետրոսյանն ընդդեմ Հայաստանի բողոքով որոշումը, հայտնում է News.am-ը: 

Գործն առնչվում էր Տեր-Պետրոսյանի դիմումին 2008 թվականի մարտի 1-ին ցույցը ցրելու, իրավական պաշտպանության արդյունավետ միջոցների բացակայության և նրան ենթադրյալ տնային կալանքի ենթարկելու վերաբերյալ:

Դատարանը որոշել է, որ առկա է Մարդու իրավունքների կոնվենցիայի 11-րդ հոդվածի խախտում, կոնկրետ՝ հավաքների ազատության իրավունք, 13-րդ հոդվածի խախտում՝ իրավական պաշտպանության արդյունավետ միջոցի իրավունք: Սակայն դատարանը մերժել է բողոքը 5-րդ հոդվածով՝ ազատության և անվտանգության իրավունք և 2-րդ հոդվածի 4-րդ արձանագրությամբ՝ տեղաշարժման ազատության իրավունք:

Դատարանը նաև որոշել է, որ ցույցի ցրումը հիմնավորված չէր: Չնայած հաղորդագրություններում նշվում էր, որ Տեր-Պետրոսյանը եղել է «տնային կալանքի» մեջ, դատարանը չի կարողացել հանգել այն եզրակացության, որ նա զրկված էր ազատությունից կամ նրա տեղաշարժման ազատությունը սահմանափակվել էր: