Ռազմական փորձագետը՝ «Մուստաֆա Քեմալ Աթաթուրք-2019» զորավարժությունների նպատակների, սցենարների մասին (ԲԱՑԱՌԻԿ)

• 03.05.2019, 18:02
•  Տարածաշրջան,  Աշխարհ,  Հարցազրույց

Ադրբեջանի տարածքում մայիսի 1-ին մեկնարկել են թուրք-ադրբեջանական համատեղ զորավարժություններ: «Մուստաֆա Քեմալ Աթաթուրք-2019» կոչվող զորավարժությունները անցկացվում են մարտական հրաձգությամբ: Թեմայի շուրջ «Արմեդիա ՏՎԳ»-ն զրուցել է «Ռազմինֆո»-ի վերլուծաբան Հայկ Խաչիկյանի հետ:

- Պարո´ն Խաչիկյան, թուրք-ադրբեջանական այս զորավարժության նպատակները որո՞նք են: Ի՞նչ սցենարներ են մշակվում:

-Ըստ ադրբեջանական կողմի հայտարարության՝ նպատակը երկու երկրների բանակների միջև համագործակցության փորձի բարձրացումն է, շտաբերի միջև աշխատանքի ներդաշնակումը, համատեղ գործողությունների մշակման և դրանց համատեղ իրագործման կարողությունների բարելավումը: Բացի պրակտիկ նշանակությունից, սա, ինչպես ցանկացած այլ հայտարարված զորավարժություն ունի քարոզչական տարրեր՝ ուժի ցուցադրություն: Հաշվի առնելով նաև զորավարժության երկկողմանիությունը՝ այստեղ բնականաբար կան նաև քաղաքական գործոններ:

Ինչ վերաբերում է սցենարներին, դատելով բաց աղբյուրներից հասանելի տվյալները, կարելի է ասել, որ կրկին հարձակողական գործողությունների խաղարկում է: Նորություն չէ, Ադրբեջանում գրեթե միշտ այդ սցենարով են գործում:

- Սովորաբար ի՞նչ հաճախականությամբ են անցկացվում թուրք-ադրբեջանական զորավարժությունները: Արդյո՞ք նկատելի է զորավարժությունների քանակի աճ:

-Ադրբեջանը և Թուրքիան զորավարժությունների մասով ունեն համագործակցության երկու ուղղություն՝ ՌՕՈՒ և ցամաքային ուժեր: Առաջին պարագայում ներգրավվում են երկու երկրների ռազմական ավիացիան ինչպես նաև ՀՕՊ-ը, այսպիսի վարժանքներ անցկացնում են պարբերաբար 2014-ից սկսած: Ինչ վերաբերում է ցամաքային ուժերին՝ այստեղ ևս աշխատանք տարվում է, և այս զորավարժությունը դրա մասն է: Ադրբեջանում՝ Բաքվի մերձակայքում, նման զորավարժություն վերջին անգամ եղել էր 2017-ի մայիսին: Հետագայում ևս եղել են համատեղ վարժանքներ, սակայան, արդեն այլ ֆորմատով ու ծավալներով: Առանձին աշխատանք է տարվում նաև Նախիջևանի առանձին համազորային բանակի հետ, որի հետ թուրքական կողմը ևս անցկացնում է համատեղ զորավարժություն, Նախիջևանում ունի իր ռազմական ներկայացուցիչը, կան մասնագետներ, որոնք օգնում են պատրաստել հատուկջոկատայինների և դիպուկահարների:

- Ի՞նչ ուժեր են ներգրավված զորավարժություններում: Ի՞նչ զինատեսակներ, զորատեսակներ ու տեխնիկա է օգտագործվում:

-Ադրբեջանական կողմից ներգրավված է Ադրբեջանի ԶՈւ 4-րդ բանակային կորպուսի մոտոհրաձգային զորամասերից մեկը: Ադրբեջանի 4-րդ կորպուսը թիկունքային է, հայտնի է նաև որպես «Բաքվի կորպուս»:

Ինչ վերաբերում է տեխնիկային, ապա արտառոց կամ նոր իրողություններ չկան: Թուրքական կողմը իր հետ բերել էր սովորական հրաձգային զինատեսակներ և ականանետներ, իսկ ադրբեջանական կողմից կիրառվում են Տ-90 և Տ-72 տանկեր, ԲՏՌ-82Ա զրահափոխադիչներ, դյուրակիր ԶՀՀ-ներ, Մի-24/35 և Մի-8/17 ուղղաթիռներ, ինչպես նաև հրետանի:

Զրուցեց Ռոզի Միքայելյանը