Աշխարհի քաղաքակրթությունները պետք է հրաժարվեն հակամարտություններից. Սի Ծինփին

• 15.05.2019, 15:16
•  Աշխարհ

Hayatsk.info

Աշխարհի տարբեր տարածաշրջանների մարդկային քաղաքակրթությունները պետք է հրաժարվեն հակամարտություններից և իրավահավասար վերաբերվեն միմյանց: Մայիսի 15-ին Չինաստանի մայրաքաղաքում «Ասիական քաղաքակրթությունների երկխոսություն» համաժողովի բացման արարողությանն այս մասին հայտարարել է ՉԺՀ-ի նախագահ Սի Ծինփինը, տեղեկացնում է «Արմենպրես»-ը, հղում կատարելով ՏԱՍՍ-ին:

«Մենք պետք է հարգենք միմյանց և մյուսներին վերաբերվենք որպես հավասարների: Բոլոր քաղաքակրթությունները կառուցված են իրենց բացառիկ մշակութային միջավայրում, որն իրենով մարմնավորում է երկրի կամ ազգի իմաստությունն ու տեսակերպը»,- նշել է պետության ղեկավարը:

«Քաղաքակրթություններից ոչ մեկն ավելի բարձր կարգավիճակ չունի մյուսի նկատմամբ: Կարծել, թե մի ռասա կամ քաղաքակրթություն բարձր է մյուսներից, տգիտություն է, իսկ նման մտածողության համաձայն գործելը՝ միանգամայն կործանարար: Եթե մարդկային քաղաքակրթությունները հանգեցվեն սոսկ մեկ գույնի կամ մոդելի, ապա աշխարհը խամրած և անբովանդակ կդառնա»,- հավելել է Սի Ծինփինը:

«Ասիական քաղաքակրթությունների երկխոսություն» համաժողովը Պեկինում տեղի է ունենում մայիսի 15 - 16-ը: Համաժողովին 2 հազարից ավելի ներկայացուցիչներ են մասնակցում աշխարհի 47 երկրներից ու տարածաշրջաններից: