Անհետացման վտանգի տակ գտնվող լեզուների թեմայով ցուցահանդես` Թուրքիայում. ներկայացված է նաև արևմտահայերենը

• 23.05.2019, 20:24
•  Տարածաշրջան,  Աշխարհ

Մայիսի 23-ին, Թուրքիայում տեղի կունենա մայրենի լեզվով մշակութային իրավունքների համար պայքարի թեմայով ցուցահանդեսի բացումը: Այդ մասին, ըստ Akunq.net-ի, հաղորդում է Gazete Duvar լրատվական կայքէջը:

Աղբյուրի համաձայն` 1990-ականներից մինչ այժմ Թուրքիայում անհետացման վտանգի տակ գտնվող լեզուների պահպանման ուղղությամբ պայքարի թեմայով սույն ցուցահանդեսը կրում է հետևյալ խորագիրը` «Մի լեզվի հետքերով. 90-ականներից մինչ օրս մշակութային ոլորտում պայքարը մայրենի լեզվի պահպանման նպատակով»: Ցուցահանդեսը գործելու է մինչև այս տարվա հունիսի 17-ը, Ստամբուլի «Քարշը սանաթ» սրահում:

Ցուցահանդեսում ներկայացված կլինեն վերջին 30 տարիներին այդ բնագավառում կատարված աշխատանքները: Այն առավելապես կենտրոնացած կլինի չերքեզերենի, արևմտահայերենի, հայոց լեզվի` Համշենի բարբառի, քրդերենի և լազերենի պահպանման ուղղությամբ արված քայլերի վրա:

Հիշեցնենք, որ անցյալ տարվա տվյալներով` Թուրքիայի տարածքում խոսվող շուրջ 20 լեզուներ լիովին վերացման վտանգի տակ են գտնվում: Դրանց շարքում են նաև արևմտահայերենը, Համշենի բարբառը, պոնտական հունարենը, ասորերենը, աբխազերենը, լազերենը, չերքեզերենը գնչուների կողմից կիրառվող ռոմաներենը և այլ լեզուներ ու բարբառներ: