ԵՄ-ն մտահոգություններ է հայտնում Թուրքիայում քաղաքապետերի փոխարինման հետ կապված

• 20.08.2019, 12:52
•  Տարածաշրջան,  Մերձավոր Արևելք,  Աշխարհ

Թուրքիայի հարավ-արևելքում 3 քաղաքների քաղաքապետերի փոխարինումը լուրջ մտահոգություն է հարուցում, քանի որ հարցականի տակ է դնում ընտրությունների ժողովրդավարական արդյունքների նկատմամբ հարգանքը, երկիրը պետք է դադարեցնի միջոցառումները, որոնք խոչընդոտում են տեղական ժողովրդավարության գործառնությանը: Այս մասին ասված է Եվրամիության արտաքին քաղաքականության ծառայության հայտարարության մեջ:

Ավելի վաղ Թուրքիայի ՆԳՆ-ն հայտնել էր երկրի հարավ-արևելքում Վանի, Դիարբեքիրի և Մարդինի քաղաքապետերին պաշտոններից հեռացնելու մասին՝ նրանց մեղադրելով Քուրդիստանի Աշխատավորական կուսակցության հետ կապերի մեջ: Հաղորդագության մեջ նշված էր, որ ՔԱԿ կառույցները մի քանի քաղաքապետերի օգտագործել են իրենց նպատակների համար, որոնք այդ կազմակերպությանը ցուցաբերել են ֆինանսական, տրանսպորտային և վարչական աջակցություն: Անցկացված քննության արդյունքում քաղաքապետեր Ադնան Սելչուկ Մըզրաքլըն, Ահմեթ Թյուրքը և Բեդիա Օզգյոքչե Էրթանը հեռացվել էին:

Հաղորդվել է այս քաղաքների քաղաքապետերի պաշտոնակատարների նշանակման, քաղաքապետարաններում խուզարկությունների, ինչպես նաև թուրքական 29 նահանգներում ՔԱԿ-ի հետ կապերի մեղադրանքով 418 մարդու ձերբակալության մասին:

Երեք քաղաքապետերի փոխարինումը «լուրջ մտահոգություն է հարուցում, քանի որ հարցականի տակ է դնում մարտի 31-ի ընտրությունների ժողովրդավարական արդյունքները», նշված է հայտարարության մեջ: