Արցախի Մարտունիում կայանալիք նռան փառատոնի տոմսերն արդեն վաճառքում են

Այս մասին «Արցախպրես»-ի թղթակցի հետ զրույցում ասել է Մարտունի քաղաքի ավագանու անդամ, փառատոնի կազմակերպիչներից Արտակ Մկրտչյանը:

Նրա խոսքով՝ ցանկացողները տոմսերը կարող են ձեռք բերել Վազգեն Սարգսյան փողոցում գտնվող «Մաստեր» էլեկտրոնային խանութից և «Արմատներ» («The Roots») կենսակենտրոնից: Տոմսի արժեքը 1000 դրամ է: Ավտոբուսները շարժվելու են Ստեփանակերտի Վերածննդի հրապարակից, ժամը 9:00-ին, իսկ ժամը 11:00-ին տեղի է ունենալու փառատոնի բացման հանդիսավոր արարողությունը:

«Պետք է նշեմ, որ այս տարի փառատոնին լինելու են մի շարք անակնկալներ և հետաքրքիր ծրագրեր: Առայժմ փառատոնին մասնակցելու հայտ է ներկայացրել 21 մենատնտես: Բացի դրանից, առանձին տաղավարներով ներկայանալու են նաև համայնքները: Այս տարի հայտեր ունենք նաև Երևան քաղաքից: Առայժմ հայտագրման գործընթացը շարունակվում է, և մինչև հոկտեմբերի 14-ը բոլոր նրանք, ովքեր ցանկություն ունեն ներկայացնելու իրենց արտադրանքը, կարող են դիմել Մարտունու շրջվարչակազմի աշխատակազմի գյուղատնտեսության բաժին»,- ավելացրել է Ա. Մկրտչյանը: