Փաշինյանը Ղարաբաղյան կարգավորման հարցում չի դադարում մանիպուլյացիաներ անել

• 21.11.2019, 19:09
• Հասմիկ Վարդանյան
•  Տարածաշրջան,  Հայաստան,  ԼՂՀ

photolur

Վարչապետ Նիկոլ Փաշինյանը Միլանի հայ համայնքի հետ հանդիպման ժամանակ հերթական անգամ խոսել է նախկինում Ղարաբաղյան կարգավորման բանակցվող տարբերակներից:

«Ասում են, որ Արցախի հարցում մենք չունենք ռազմավարություն: Իսկ ո՞րն էր Սերժ Սարգսյանի և Ռոբերտ Քոչարյանի ռազմավարությունը, Մեղրին տա՞լն էր ռազմավարությունը, թե՞ էն էր , որ ինչպես իրենք էին բանակցում Ադրբեջանի 7 շրջանները վերադարձնեին խաղաղության դիմաց: Ո՞րն էր ռազմավարությունը Սերժ Սարգսյանի, որ Աղդամը մեր հայրենիքը չէ: Եվ հիմա նրանք մեզ մեղադրում են, թե մենք հող ենք վերադարձնում», – ասել է նա։

Փաշինյանի այս հայտարարությունն ակնհայտ մանիպուլյացիա է: Փաշինյանը ընտրողաբար բանակցային սեղանին եղած գաղտնի փաթեթներից, որոնք, ի դեպ, այդպես էլ չեն ստորագրվել, հանրայնացնում է հատվածներ՝ դրանք ներկայացնելով իրեն ձեռնտու լույսի ներքո: Փաշինյանի թվարկած հարցերը եղե՞լ են բանակցային փաթեթի սկզբնական տարբերակում, թե՞ դրանք արդյունք են արդեն կայացած ինչ-ինչ բանակցությունների, եթե արդյունք չեն՝ ապա նախկին իշխանությունները ինչի՞ են հասել կամ չեն հասել բանակցություններում, ի՞նչ աշխարհաքաղաքական պայմաններում են ընթացել այդ բանակցությունները և այլն: Սրանք հարցեր են, որոնք Փաշինյանը նախընտրում է չգաղտնազերծել՝ միգուցե այն պատճառով, որ այդ պատասխաններն այլևս մանիպուլիացիանների հնարավորություն չեն ստեղծում:

Միաժամանակ անկախ նրանից թե նախկինների ռազմավարությունն ինչպիսին է եղել, փաստը մնում է այն, որ գործող իշխանությունները երկրի թիվ մեկ անվտանգային խնդրի՝ Ղարաբաղյան հակամարտության հարցում չունեն որևէ ռազմավարություն, ինչն առնվազն տարակուսելի է: Ավելին` վարչապետ Նիկոլ Փաշինյանն օրերս հայտարարեց, որ կառուցողական չի լինի, որ Հայաստանը խոսի իր համար ցանկալի կարգավորման տարբերակի մասին, քանի որ իր համար շատ կարևոր է, որ կարգավորումը ընդունելի լինի նաև Ադրբեջանի ժողովրդի համար: Իսկ Ադրբեջանի նախագահն արդեն Փաշինյանին պատասխանել է. Ադրբեջանի ժողովրդի համար ընդունելի միակ տարբերակը՝ հարցի լուծումն Ադրբեջանի տարածքային ամբողջականության շրջանակներում կամ «Ղարաբաղն Ադրբեջան է և բացականչական նշան»: Ստացվում է սրանից պետք է հետևություննե՞ր անել Ղարաբաղի հարցում Փաշինյանի քաղաքականության մասին:

Վերադառնալով նախկինների ռազմավարությանը՝ հարկ է ընդգծել, որ անկախ նրանից՝ թե որ փուլում ինչ է բանակցվել, բանակցային սեղանին հաջողվել է արձանագրել մի շատ կարևոր բան՝ Լեռնային Ղարաբաղի վերջնական կարգավիճակը պետք է որոշվի պարտադիր իրավական ուժ ունեցող կամարտահայտման միջոցով: Բանակցային գործընթացի դինամիկան հասկանալու համար հիշեցնենք, որ Լևոն Տեր-Պետրոսյանի ժամանակ քննարկվում էր կարգավորման փուլային տարբերակը: