Ոչ ոք Արցախի ինքնորոշման իրավունքը չի հարմարեցնելու Ադրբեջանի ճաշակին. Կարեն Բեքարյան

• 14.12.2019, 14:27
•  Աշխարհ,  Հայաստան,  ԼՂՀ

Երբ օգտագործում ենք «իշխանություն» արտահայտությունը, պետք է հասկանանք, թե ինչի հետ գործ ունենք՝ ինստիտուցիոնալ էլեմենտի՞, թե՞ դասական էլեմենտի հետ։ Հավատցեք՝ ոչ մի բանի հետ էլ գործ չունենք. գործ ունենք մեկ անձի քմահաճույքի հետ, այսօր կայացած կլոր սեղան-քննարկման ժամանակ ասաց քաղաքական վերլուծաբան Կարեն Բեքարյանը, հայտնում է «Այսօր»-ը։ 

«Ինստիտուտներն անգործության են մատնված և անգործության են մատնվում ամեն ժամվա կտրվածքով։ Դրանք ուղղակի չեն գործում։ Պետական կառավարման համակարգը վարչապետի կողմից հայտարարված է հակահեղափոխական», - ասաց նա։

Անդրադառնալով ղարաբաղյան հակամարտության թեմային՝ Բեքարյանը շեշտեց, որ արդեն իսկ հատված են մի շարք կարմիր գծեր։

«Կարմիր գիծ առաջին. ահավոր հարված Ղարաբաղի ինքնորոշման իրավունքին, դրա ընկալմանն ու իրացման գործընթացին։ Ասում են՝ պետք է լինի այնպիսի լուծում, որն ընդունելի լինի Հայաստանի, Արցախի և Ադրբեջանի ժողովուրդների համար։ Բայց իրավունքը ճաշակի դաշտում չէ։ Ոչ մեկն Արցախի ինքորոշման իրավունքը չի հարմարեցնելու Ադրբեջանի ճաշակին և ընկալումներին։ Եթե դրոշակդ տանում ես այս թեզով, տորպեդահարում ես Արցախի ինքնորոշման իրավունքը։ Երբ հայտարարում ես, որ Արցախը Հայաստան է, և վերջ, դու ոտնահարում ես Արցախի ինքնորոշման իրավունքը, որի երաշխավորն ես», - ամփոփեց Կարեն Բեքարյանը։