ԵՐԵՎԱՆ 6 C°
ՀՀ ԿԲ -
  • USD - 396.02 դրամ +0,02 EUR - 431.27 դրամ +0,27 RUB - 5.71 դրամ +0,71 GBP - 490.04 դրամ +0,04
  • ՈՍԿԻ - - դրամ ԱՐԾԱԹ - - դրամ ՊԼԱՏԻՆ - - դրամ

Ուժային կառույցների նկատմամբ ՀՀ-ում վերաբերմունք է փոխվել. Կուտոյանի մահը դրա հերթական ցուցիչն էր

ՀՀ ԱԱԾ նախկին տնօրեն Գեորգի Կուտոյանի մահը հերթական ցնցումն էր մեր հասարակության համար, հերթական ահազանգը, որ «սիրո ու հանդուրժողականության» հեղափոխությունն իր էությամբ ատելության ու անհանդուրժողականության հաղթարշավ է՝ ցավալի կորուստներով: Ինքը՝ հեղափոխության դրոշակով իշխանության եկած վարչապետը, Կուտոյանի մահվան առնչությամբ ոչինչ չխոսեց, անգամ պատշաճ կերպով չցավակցեց ԱԱԾ նախկին տնօրենի ընտանիքի անդամներին (ՀՀ վարչապետի ցավակցական ուղերձը ԶԼՄ-ներով տարածվել է «ըստ ցանկության», այսինքն՝ վարչապետի ուղերձը ստացել են միայն այն ԶԼՄ-ները, որոնք հետաքրքրվել են դրանով): Փաշինյանը և իր քաղաքական թիմը չմասնակցեցին նաև Կուտոյանի հոգեհանգստի և հուղարկավորության արարողություններին՝ հերթական անգամ իրենց վերաբերմունքը ցույց տալով, այդ թվում, պետական ինստիտուտների ու ուժային կառույցների նկատմամբ:

Պարտավո՞ր էր Փաշինյանը մասնակցել Կուտոյանի հուղարկավորությանը: Ո՛չ: Մեր օրենսդրության մեջ չկա որևէ արարողակարգային նորմ՝ պարտավորեցնող երկրի ղեկավարությանը մասնակցել ուժային կառույցների նախկին ղեկավարների հուղարկավորությանը: Բայց, փոխարենը, կար գործող պրակտիկա՝ խարսխված այս կառույցների նկատմամբ պետության վերաբերմունքի ու բարոյական արժեքների վրա: Բավական է միայն հիշել ԱԱԾ նախկին տնօրեն Գորիկ Հակոբյանի հոգեհանգստի արարողությունը 2017-ի հոկտեմբերի 2-ին, որին մասնակցում էին գործող նախագահ Սերժ Սարգսյանը, առաջին տիկին Ռիտա Սարգսյանը, ՀՀ վարչապետ Կարեն Կարապետյանը, ՀՀ պաշտպանության նախարար Վիգեն Սարգսյանը, ՀՀ արտակարգ իրավիճակների նախարար Դավիթ Տոնոյանը, ՀՀ միջազգային տնտեսական ինտեգրման և բարեփոխումների նախարար, փոխվարչապետ Վաչե Գաբրիելյանը, ՀՀ ոստիկանապետ Վլադիմիր Գասպարյանը, բարձրաստիճան այլ պաշտոնյաներ, պատգամավորներ: Փաշինյանը շրջանցեց և այս՝ բարոյական նորմերն ու արժեքները՝ թելադրելով սեփականը՝ ատելությունն ու անհանդուրժողականությունը:  

Ի դեպ, երկրի ուժային կառույցների նախկին ղեկավարների նկատմամբ այս կերպ ընդգծված հարգանքի ցուցադրումը միայն մեր ձեռքբերումը չի եղել: Աշխարհի շատ երկրներ, հատկապես այնպիսիք, որտեղ պետական այս մարմինները առանձնահատուկ դեր ու նշանակություն ունեն, ամենաբարձր մակարդակով հետևում են չգրված այս օրենքներին: Որպես բավական թարմ օրինակ՝ կարող ենք հիշել Իսրայելի պաշտպանության նախկին նախարար Մոշե Արենսի հուղարկավորությունը՝ 2019-ի հունվարին: Արենսի թաղման արարողությանը մասնակցում էին երկրի մի շարք բարձրաստիճան պաշտոնյաներ՝ վարչապետ Բենիամին Նեթանյահուի և նախագահ Ռեուվեն Ռիվլինի գլխավորությամբ:

Նույն կերպ և ԱՄՆ-ում: Օրինակ՝ երկրի պաշտպանության նախկին նախարար (1981-1987թթ.) Կասպար Ուայնբերգերի հուղարկավորությանը 2006-ի ապրիլի 5-ին մասնակցում էր երկրի փոխնախագահ Ռիչարդ Չեյնին, բարձրաստիճան մի շարք պաշտոնյաներ:

Այս ցանկը կարելի է երկար շարունակել՝ բերելով օրինակներ աշխարհի շատ երկրներից: Բայց մեզ համար սա արդեն երկրորդական է. մենք ունենք մեր այսօրվա իրականությունը, որտեղ այս չգրված կանոնները, պետական ինստիտուտների, ուժային կառույցների նկատմամբ հարգանքն ու հատուկ վերաբերմունքը այլևս անցյալում են:


Ամենաընթերցվածը

օրվա

շաբաթվա

ամսվա

    Եղանակ
    Երևան
    Անձրև
    Խոնավություն՝ 87%
    Քամի՝ 2,57 կմ/ժ
    6 C°
     
    12°   
    20.03.2024
    14°   
    21.03.2024
    Հարցում

    Ի՞նչ եք կարծում՝ մե՞ծ է արդյոք ռազմական գործողություններին Իրանի մասնակցության հավանականությունը: