Ֆրանսահայերն ահազանգում են Փարիզի քաղաքապետի թեկնածուի և Ադրբեջանի իշխանության կապերի մասին

• 06.03.2020, 11:03
•  Եվրոպա,  Աշխարհ,  Սփյուռք

Փարիզի քաղաքապետի ընտրություններում որպես թեկնածու առաջադրված Ռաշիդա Դաթին սերտ կապեր ունի Ադրբեջանի իշխանությունների հետ: «Արմենպրես»-ի փոխանցմամբ` այս մասին Marianne օնլայն հարթակում հրապարակված հոդվածում ահազանգում են Ֆրանսիայի հայկական կազմակերպությունների համակարգող խորհրդի համանախագահներ Մուրադ Փափազյանը, Արա Թորանյանը («Nouvelles d'Arménie» ամսագրի գլխավոր խմբագիր) և Իլ դե Ֆրանսի քաղաքային խորհրդի անդամ Պատրիկ Կարամը:

«Արժե՞ հիշեցնել, որ մադամ Դաթին, որը հայտարարում է Բաքվին իր սատարման մասին, դեմ է արտահայտվել 2017թ. Եվրախորհրդարանում հետաքննությանը` եվրոպացի քաղաքական գործիչների վրա Ադրբեջանի կողմից անօրինական միջոցներով ճնշում գործադրելու հարցով»,- նշված է հոդվածում:

Ռաշիդայի մտերմությունն Ալիևի ռեժիմի հետ վառ արտահայտվել է նրա կողմից 2011թ. Ադրբեջանի առաջին տիկին Մեհրիբան Ալիևայի պատվին կազմակերպված մեծ խնջույքի ընթացքում: Փարիզի քաղաքապետի թեկնածուն հատկապես 2016թ. Ադրբեջանի կողմից սանձազերծված ապրիլյան պատերազմից հետո հանդես է եկել Լեռնային Ղարաբաղում բնակվող հայերի դեմ հայտարարություններով:

Հոդվածի հեղինակները հույս են հայտնել, որ Ռաշիդա Դաթին կդադարեցնի Ադրբեջանի իշխանությունների հետ իր արտոնյալ հարաբերությունները:

Ֆրանսիայում տեղական ինքնակառավարման մարմինների ընտրությունները տեղի կունենան մարտի 15-22-ը: Փարիզի քաղաքապետի պաշտոնի համար Ռաշիդա Դաթիի հետ պայքարող թեկնածուներից ֆավորիտներ են գործող քաղաքապետ Անն Իդալգոն, որն իր պաշտոնավարման ընթացքում այցելել է Հայաստան, աչքի ընկել հայանպաստ դիրքորոշումներով, և Ֆրանսիայի առողջապահության նախկին նախարար Անյես Բյուզենը. նրա թեկնածությունն առաջադրել է նախագահ Էմանուել Մակրոնի կուսակցությունը:  

Ի դեպ, Իդալգոն մշտապես եղել է հայ համայնքի կողքին, մասնակցել տարբեր միջոցառումների, այդ թվում՝  Ֆրանսիայի հայկական կազմակերպությունների համակարգող խորհրդի ամենամյա ընթրիքներին, Հայաստան այցի ընթացքում եղել է Ծիծեռնակաբերդի հուշահամալիրում՝ հարգելով Հայոց ցեղասպանության զոհերի հիշատակը, ինչպես նաև նախաձեռնել է Փարիզում ԹՈՒՄՈ կենտրոնի բացումը: