Հնդկաստանում վաճառքի են հանել աշխարհի ամենաբարձր` Միասնության Արձանը «կորոնավիրուսի դեմ պայքարի համար». The Indian Express

Հնդկաստանում անհայտ անձինք փորձել են համացանցի միջոցով վաճառել աշխարհի ամենաբարձր քանդակը՝ Միասնության արձանը (240 մետր), որը տեղադրված է Գուջարաթ նահանգում:   

Ինչպես հայտնում է The Indian Express-ը, նախաձեռնության նպատակն, իբրև թե, կորոնավիրուսի դեմ պայքարի համար միջոցներ հավաքելն է եղել: Հուշարձանը վաճառքի է ներկայացվել OLX (Online Exchange) հարթակում, որտեղ հայտարարություններ են տեղադրվում ապրանքների վաճառքի, գնման կամ փոխանակման մասին:

«Արտակարգ իրավիճակ է: Վաճառվում է Միասնության արձանը հիվանդանոցների և բուժսարքավորումների համար միջոցներ հավաքելու նպատակով»,- ասվում էր հայտարարության մեջ:

Հուշարձանը գնահատվել է 300 մլրդ ռուփի (մոտ $4 մլրդ): Հայտարարությունը տեղադրվել է ապրիլի 4-ին, սակայն մեկ օր անց նահանգի իշխանությունները նոր նկատել են այն և դիմել ոստիկանություն:  

Հնդկաստանում կորոնավիրոսով վարակման 3588 դեպք է գրանցվել, որոնցից 99-ը՝ մահվան ելքով: