Ղարաբաղյան կարգավորման վերաբերյալ Լավրովի հայտարարության մտահոգիչ դրույթները

• 22.04.2020, 19:09
• Հասմիկ Վարդանյան
•  Տարածաշրջան,  Աշխարհ,  Հայաստան

AP Photo/Pavel Golovkin

Գարչակովի հիմնադրամի կողմից կազմակերպված առցանց կլոր սեղանի ժամանակ Ռուսաստանի արտաքին գործերի նախարար Սերգեյ Լավրովի անդրադարձը Ղարաբաղյան կարգավորման բանակցային գործընթացի ընթացիկ վիճակին հայկական կողմերի համար բավականին մտահոգիչ էլեմենտներ է պարունակում:

Մասնավորապես, այս պահին, ըստ Լավրովի, բանակցային գործընթացում քննարկվում է հակամարտության կարգավորման փուլային տարբերակը: Լավրովի խոսքով՝ կան նախագծեր, որոնք մեկ տարի առաջ՝ 2019 թվականի ապրիլին համանախագահների մասնակցությամբ Մոսկվայում Հայաստանի, Ադրբեջանի և Ռուսաստանի ԱԳ նախարարների հանդիպման ժամանակ են տարածվել, դրանք այժմ ակտիվ քննարկվում է: «Այդ փաստաթղթերը ենթադրում են հակամարտության կարգավորում փուլային մոտեցման հիման վրա», - նշել է ՌԴ ԱԳ նախարարը:

Ավելին, ինչպես հետևում է Լավրովի խոսքից, արդեն ամրագրված է, առաջին էտապում նախատեսվող քայլերը՝ տարածքների վերադարձ Ադրբեջանին և տրանսպորտային, տնտեսական և այլ հաղորդակցության բացում, ոչ մի խոսք Արցախի կարգավիճակի մասին՝ այդ թվում նաև միջանկյալ:

Հետաքրքիր է, որ ՀՀ արտաքին գործերի նախարար Զոհրաբ Մնացականյանն, անդրադառնալով Լավրովի այս հայտարարությունը, որևէ կերպ չհերքեց բանակցային սեղանին նման փաստաթղթի առկայությունը: «Այո՛, այդ մեկնաբանության մեջ եղել են հղումներ բազմաթիվ փաստաթղթերի, սկսած Քի Վեսթից մինչև վերջերս: Նշվել է նաև, թե ինչ փաստաթղթի մասին է խոսք գնում այս երկու տարվա ընթացքում», - նշել է նախարարը: Ավելին, նախարարը նշեց, որ 2018 թվականից ի վեր քննարկումները սահմանափակվել են առանձին տարրերի շուրջ կողմերի մոտեցումների քննարկմամբ և գնահատմամբ: Նշենք, որ կարգավորման գործընթացին նման մոտեցումն ավելի շատ բնորոշ է փուլային տարբերակին:

Մտահոգիչ է նաև Լավրովի անդրադարձը Ղարաբաղյան կարգավորման վերաբերյալ ՄԱԿ-ի Անվտանգության խորհրդի բանաձևերին: Թեև Լավրովը հիմնական շեշտադրումը կատարում է բանաձևերի՝ պատերազմական գործողությունները դադարեցնելու և խաղաղ բանակցությունները սկսելու պահանջի վրա, սակայն այդ համատեքստում նշում է նաև, որ «բանաձևերը հաստատում են Ադրբեջանի Հանրապետության տարածքային անձեռնմխելիությունը»: «Ես վստահ եմ, որ մենք, երբ որոշենք ստորագրել այդ փաստաթղթերը՝ դա կլինի ՄԱԿ Անվտանգության խորհրդի բանաձևերի կատարման ուղղությամբ կարևոր քայլ», - նշել է ՌԴ ԱԳ նախարարը:

Լավրովի հայտարարության մյուս մտահոգիչ տարրը վերաբերում է բանակցային ձևաչափին: Հիշեցնենք, համանախագահ երկրները, այդ թվում նաև Ռուսաստանի ԱԳ նախարարն անձամբ բազմիցս նշել էր, որ Արցախի՝ բանակցային սեղան վերադառնալու հարցը պետք է որոշեն հակամարտության կողմերը:Միևնույն ժամանակ նշվում էր, որ ինչ-որ փուլից Արցախը պետք է միանա բանակցություններին: Այժմ ՌԴ ԱԳ նախարարն արդեն հայտարարում է, որ առկա ձևաչափը կայացած է: Նման հայտարարություն է արվում որպես լիարժեք կողմ Արցախը բանակցային սեղան վերադարձնելու մասին Հայաստանի իշխանությունների հայտարարությունների ֆոնին;

Այս ամենի հետ կապված ևս մեկ մտահոգիչ հանգամանք: Հաշվի առնելով վերոնշյալը ակնհայտ է դառնում, որ Հայաստանի իշխանությունները Ղարաբաղյան կարգավորման համատեքստում ազնիվ չեն սեփական հանրության հետ: Այսպիսով, իրականում պաշտոնական Երևանը շատ ավելի վաղ է քննարկումներից և խորհրդատվություններից անցել բանակցություններին, քան հայտարարել է այդ մասին: Այսօր բանակցային սեղանին, չնայած իշխանության հավաստիացումներին կա փաստաթուղթ՝ մի կողմ թողնենք՝ թե ինչ դիրքորոշում ունի դրա վերաբերյալ պաշտոնական Երևանը: Ընդ որում, առկա փաստաթուղթը, որի շուրջ այժմ ակտիվ քննարկումներ են ընթանում որևէ կերպ չի բխում հայկական կողմերի շահերից: