Պուտինը շնորհավորել է Հայաստանին Հայրենական մեծ պատերազմում hաղթանակի 75-ամյակի առիթով

• 08.05.2020, 14:21
•  ԵԱՏՄ,  Աշխարհ,  Հայաստան

ՌԴ նախագահ Վլադիմիր Պուտինը Հայրենական մեծ պատերազմում Հաղթանակի 75-ամյակի առիթով շնորհավորական ուղերձ է հղել Հայաստանի, Ադրբեջանի, Բելառուսի, Ղազախստանի, Ղրղզստանի, Մոլդովայի, Տաջիկստանի, Թուրքմենստանի, Ուզբեկստանի, Աբխազիայի, Հարավային Օսիայի առաջնորդներին և քաղաքացիներին, ինչպես նաև Վրաստանի ու Ուկրաինայի ժողովուրդներին: Այս մասին հայտնում են Կրեմլի մամուլի ծառայությունից:

Աղբյուրի փոխանցմամբ՝ Ռուսաստանի նախագահը շեշտել է, որ մեր երկրներում սրբորեն հարգում են հերոսների հիշատակը, որոնք ճակատամարտում իրենց խիզախությամբ և թիկունքում անձնվեր աշխատանքով օգնեցին նացիզմի դեմ Հաղթանակին, որը դարձավ մեր ընդհանուր մեծագույն ձեռքբերումը:

«Ներկայիս սերունդների սրբազան պարտքն է հավիտյանս պահպանել նրանց մասին հիշողությունը, ովքեր անթիվ զոհողությունների ու զրկանքների գնով պաշտպանեցին հայրենի հողի ազատությունը, ուշադրությամբ ու հոգատարությամբ շրջապատել մեր թանկագին վետերաններին»,- նշել է Վլադիմիր Պուտինը:

Նա հիշեցրել է Հայրենական մեծ պատերազմի արդյունքները վերաշարադրելու, նացիստների և նրանց հանցակիցների կողմից գործած անմարդկային հանցագործությունները ճերմակեցնելու ու մոռացության մատնելու ցանկացած փորձին վճռականորեն դիմակայելու անհրաժեշտությունը:

Վլադիմիր Պուտինը վստահություն է հայտնել, որ հայրերի և պապերի սխրանքի մասին ընդհանուր հիշողությունը կնպաստի տարբեր ոլորտներում երկկողմ համագործակցության կառուցողական զարգացմանը, ինչպես նաև գործընկերային փոխգործակցությանը ժամանակակից մարտահրավերներին ու սպառնալիքներին հակազդելու գործում, այդ թվում՝ այնպիսի, ինչպիսին կորոնավիրուսի համավարակն է:

Նա Հայրենական մեծ պատերազմի բոլոր վետերաններին, պարտիզաններին և թիկունքի աշխատավորներին փոխանցել է երախտիքի անկեղծ խոսքեր և քաջ առողջության, բարեկեցության և երկարատև ապրելու մաղթանքներ: