Արցախում հաստատվել է կորոնավիրուսի մեկ նոր դեպք. վարակակիր քաղաքացին ժամանել է ՀՀ-ից

• 13.07.2020, 12:15
•  ԼՂՀ

Արցախի Հանրապետությունում հաստատվել է կորոնավիրուսի մեկ նոր դեպք:

Այս մասին հայտնում է Արցախի տեղեկատվական շտաբի «Ֆեյսբուք»-ի պաշտոնական էջը` հղում անելով երկրի Առողջապահության նախարարության տվյալներին:

«Մարտունի քաղաքում հաստատվել է կորոնավիրուսային հիվանդության մեկ նոր դեպք: Վարակակիր քաղաքացին ժամանել է ՀՀ-ից. սահմանային անցակետում նրանից նմուշառում է իրականացվել և ՊՇՌ հետազոտության արդյունքում բացահայտվել է կորոնավիրուսով վարակվածությունը»,- նշված է հայտարարությունում:

Գրանցվել է առողջացման մեկ նոր դեպք: Առայսօր COVID-19-ը ախտորոշվել է 148 մարդու մոտ, որից 120-ը հաղթահարել է հիվանդությունը: Փաստացի բուժում է ստանում 28 վարակակիր, մեկուսացված է 86 քաղաքացի: COVID-19 –ի ախտորոշմամբ 2 հիվանդի առողջական վիճակը ծանր է, մեկինը՝ միջին ծանրության: Թեստավորումների նպատակով 191 նմուշառում է իրականացվել:

Մինչ այսօր իրականացվել է 2 898 փորձանմուշի հետազոտություն: Երկրում մահվան դեպքեր չեն արձանագրվել։