Մակրոնը հրաժարվում է Թուրքիային գործընկեր համարել

• 10.09.2020, 18:09
•  Եվրոպա,  Տարածաշրջան,  Աշխարհ

Թուրքիան Արևելյան Միջերկրական ծովում այլևս մեր գործընկերը չէ, հայտարարել է Ֆրանսիայի նախագահ Էմանուել Մակրոնը ՝ շեշտելով, որ Անկարայի վերաբերյալ Եվրոպայի վերաբերմունքը պետք է ավելի միասնական և պարզ լինի, փոխանցում է «ՌԻԱ Նովոստի»-ն։

«Հասկանալի է, որ Թուրքիան այլևս գործընկեր չէ այս տարածաշրջանում», - ասել է Մակրոնը։

Ֆրանսիայի ղեկավարը շեշտել է, որ Թուրքիան համաձայնագիր է ստորագրել Լիբիայի ազգային համաձայնության կառավարության հետ, որը ժխտում է Հունաստանի օրինական իրավունքները: Մակրոնը նշել է նաև, որ Կիպրոսի բացառիկ տնտեսական գոտում թուրքական հորատման մեթոդներն անընդունելի են:

«Թուրքիան բազմապատկում է սադրանքները, որոնք վայել չեն մեծ պետությանը», - ասել է նա:

«Մենք ՝ եվրոպացիներս, պետք է վճռական և ուժեղ լինենք ոչ թե թուրք ժողովրդի, այլ նախագահ Էրդողանի կառավարության նկատմամբ, քանի որ վերջինիս պահվածքն անընդունելի է», - ասել է Մակրոնը:

Նա նշել է, որ ԵՄ սահմանած կարմիր գծերը պարզ են. հարգանք ԵՄ անդամ բոլոր երկրների ինքնիշխանության նկատմամբ, միջազգային իրավունքի հարգում, բոլոր միակողմանի գործողությունների դատապարտում. «Մեր ցանկությունն է խուսափել որևէ սրացումից...։ Թուրքիան այսօր պետք է հստակեցնի իր մտադրությունները»,- ասել է Մակրոնը: