Թուրք հանցագործի մուրճի հարվածից վիրավորում ստացած երիտասարդը վիրահատության կարիք ունի․ Լենա Նազարյան

• 29.10.2020, 16:10
•  Սփյուռք

Քիչ առաջ հեռախոսով խոսեցի Ֆրանսիայում ի աջակցություն Արցախի տեղի ունեցած քայլերթի ժամանակ թուրք հանցագործի մուրճի հարվածից գլխի հատվածում վիրավորում ստացած երիտասարդի քրոջ հետ: Այս մասին ֆեյսբուքյան իր էջում գրել է ԱԺ փոխխոսնակ Լենա Նազարյանը:

Նա, մասնավորապես, նշել է. «Գեւորգը դեռ գտնվում է հիվանդանոցում, վիրահատության կարիք կա, բայց, բարեբախտաբար, նրա կյանքին վտանգ չի սպառնում: Շուտափույթ ապաքինում մաղթեցի Գեւորգին ու շնորհակալություն հայտնեցի, որ մեր հայրենակիցները շարունակում են համայն աշխարհին ահազանգել Արցախի եւ Հայաստանի դեմ դուրս եկած ադրբեջանա-թուրքական ահաբեկչական դաշինքի մասին:

Այսօր էլ առավոտյան Ֆրանսիայի Նիցցա քաղաքում դանակով զինված մի մոլեռանդ հարձակվել է եկեղեցում գտնվող մարդկանց վրա: Եվ դա դեղի է ունենում Փարիզում ուսուցչի գլխատումից 13 օր անց:

Ցավում եմ, որ Ֆրանսիայի մեր բարեկամ ժոովուրդին նորից ցավ են պատճառում: Եթե ժողովրդավարության առաջնորդները ի զորու չլինեն սաստել ահաբեկչական մեթոդներով գործող պետություններին, ապա այդ պետություններից դուրս եկող քաղաքացիներն իրենց անհանդուրժող, ծայրահեղական ու հանցագործ վարքով խաթարելու են մարդկանց հավատն առ ազատությունը, ժողովրդավարությունն ու մարդու իրավունքը ու այս պարագայում ոչ մեկ՝ անկախ ազգությունից ու բնակությունից, չի կարող մտածել, որ հանգիստ ու խաղաղ կյանք կարող է ունենալ: Մենք պե՛տք է միասին գործենք»:

Հիշեցնենք, որ հոկտեմբերի 28-ին Ֆրանսիայի Իզեր շրջանի Վիեն քաղաքի մոտ հայ ցուցարարների վրա հարձակում են գործել թուրքեր, նրանք մուրճերով հարվածել են հայ ցուցարարներին։