Իրակլի Ղարիբաշվիլին կդառնա Վրաստանի նոր վարչապետը: «Վրացական երազանք» իշխող կուսակցության քաղխորհրդի նիստից հետո ճեպազրույցում նրա թեկնածության մասին հայտարարել է կուսակցության նախագահ Իրակլի Կոբախիձեն, փոխանցում է News.am-ը:
Ներկայումս Իրակլի Ղարիբաշվիլին զբաղեցնում է պաշտպանության նախարարի պաշտոնը: Խորհրդարանի կողմից հաստատվելու դեպքում նա իր քաղաքական կարիերայի ընթացքում երկրորդ անգամ կդառնա Վրաստանի վարչապետը:
Իշխող կուսակցությունը ստիպված էր նոր վարչապետի թեկնածություն ընտրել այն բանից հետո, երբ այսօր անսպասելիորեն հրաժարական էր ներկայացրել Գեորգի Գախարիան: Նա իր որոշման մասին հայտարարել էր հատուկ ճեպազրույցի ժամանակ՝ ընդդիմության առաջնորդ Նիկա Մելիայի պատրաստվող կալանավորման շուրջ առաջացած լարված իրավիճակի ֆոնին: Գախարիան շեշտել էր, որ հրաժարականի պատճառը իշխող կուսակցությունում տարաձայնություններն են՝ կապված Նիկա Մելիայի նկատմամբ խափանման միջոց կալանքի վերաբերյալ դատարանի որոշման կատարման հետ:
