Ռուսաստանի նկատմամբ անհրաժեշտ է սահմանել «կարմիր գծեր». Մակրոն

• 18.04.2021, 12:05
•  Եվրոպա,  ԵԱՏՄ,  Աշխարհ

Ռուսաստանի նկատմամբ անհրաժեշտ է սահմանել «կարմիր գծեր», որոնք խախտելու դեպքում կկիրառվեն պատժամիջոցներ: Սակայն պատժամիջոցներն ինքնին բավարար չեն՝ չնայած դրանք կազմում են համալիր միջոցառումների մաս: Այդ մասին հայտարարել է Ֆրանսիայի նախագահ Էմանուել Մակրոնը:

Նրա խոսքով՝ անհրաժեշտ է մշակել Մոսկվայի հետ հարաբերություններում երկկողմանի մոտեցում: Այդ համատեքստում Մակրոնն ընդգծել է երկխոսության կարևորությունը: «Եթե մենք ցանկանում ենք համակարգ, որը կլինի ավելի լավը սպառազինությունների շուրջ վերահսկողության առումով, եթե մենք ցանկանում ենք կայունացնել աշխարհում ներկայիս հակամարտությունների մեծամասնությունը, մեզ անհրաժեշտ է բաց և անկեղծ երկխոսություն Ռուսաստանի հետ»,-ասել է Մակրոնը:

Նա հավելել է, որ Ռուսաստանի հետ տարաձայնությունների դեպքում անհրաժեշտ է տալ հստակ ազդանշաններ: «Կարծում եմ անընդունելի վարքի դեպքում մենք իսկապես պետք է սահմանենք պատժամիջոցներ: Դա այն է, ինչ մենք արել ենք Ուկրաինայից հետո և տեղի ունեցած մի շարք ճգնաժամերի դեպքում: Մենք պետք է սահմանենք կարմիր գծեր Ռուսաստանի հետ»,-հայտարարել է Ֆրանսիայի նախագահը: Մակրոնը նշել է, որ պատժամիջոցներն ինքնին բավարար չեն, սակայն դրանք անհրաժեշտ միջոցառումների թվին են պատկանում: