Ադրբեջանի իշխանությունների կողմից հովանավորվող հայատյացությունը վտանգավոր է նաև այլ երկրների համար. Արման Թաթոյան

• 23.11.2021, 14:22
•  Տարածաշրջան,  Աշխարհ,  Հայաստան

Ադրբեջանական իշխանությունների կողմից հովանավորվող հայատյացությունն ամբողջ աշխարհում ապրող երկու ժողովուրդներին թշնամանքի մեջ պահելու նպատակային քաղաքականություն է, որը վտանգում է նաև տվյալ երկրների կայունությունն ու մարդու իրավունքների համակարգը։

«Արմենպրես»-ի փոխանցմամբ՝ այս մասին ասել է ՀՀ մարդու իրավունքների պաշտպան Արման Թաթոյանը ԱՄՆ-ում հայկական լրատվամիջոցների հետ մամուլի ասուլիսի ժամանակ։

Ամերիկայի Հայ դատի հանձնախմբի հրավերով այս օրերին ԱՄՆ-ում գտնվող ՀՀ մարդու իրավունքների պաշտպանն ընդգծել է՝ հայասպանությունը, խախտումները Ադրբեջանի իշխանությունների կողմից խրախուսվում են բարձր մակարդակով:

«Այս ամենը չի սկսվել վերջին պատերազմով, այն շատ ավելի խորը արմատներ ունի: Դրա օրինակները բազմաթիվ են»,- շեշտել է նա:

Անդրադառնալով 2020 թվականի պատերազմին և դրա հետևանքներին՝ պաշտպանը նկատել է՝ 2020 թվականի նոյեմբերի 9-ից հետո մարտահրավերները չեն դադարել.

«Սա ոչ այլ ինչ է, քան՝ շարունակվող պատերազմ: Պատերազմը ոչ միայն ընթացքում արհավիրքներ բերեց, այլ նաև երկարաժամկետ հետևանքներ թողեց: Հայաստանում, Արցախում և ընդհանրապես՝ աշխարհում ապրող մեր ժողովուրդն այդ հետևանքները հենց հիմա էլ զգում է: Սյունիքում, Գեղարքունիքում՝ Հայաստանի գյուղերի անմիջական հարևանությամբ ու ճանապարհներին ներկայում հայտնվել են ադրբեջանական դրոշներ, ցուցանակներ ու անցակետեր»:

Արման Թաթոյանն ընդգծել է՝ այդ երկրի (Ադրբեջանի) իշխանությունները պետք է ենթարկվեն պատասխանատվության՝ լինի քաղաքական, թե քրեական: Խախտումների աղբյուրը, հիմքը միայն այդ կերպ կարող է վերացվել: