Թուրքիայի դեսպանը կանչվել է Գերմանիայի արտաքին գործերի նախարարություն՝ թուրքական կառավարության կողմից գերմանական դատական համակարգի քննադատության հետ կապված։ Այս մասին ասվում է երեքշաբթի օրը Գերմանիայի արտաքին գործերի նախարարության Twitter-ում հրապարակված հայտարարության մեջ, փոխանցում է ՏԱՍՍ-ը։
«Թուրքիայի դեսպանին տեղեկացվել է, որ Գերմանիայի կառավարությունը կտրականապես հերքում է թուրքական կառավարության կողմից հնչեցված մեղադրանքները՝ կապված Գերմանիայում խոսքի և մամուլի ազատության, ինչպես նաև դատական համակարգի հետ», - նշված է Գերմանիայի ԱԳՆ հայտարարությունում։
Մայիսի 17-ին Թուրքիայի ԱԳՆ-ն է կանչվել Անկարայում Գերմանիայի դեսպան Յուրգեն Շուլցը՝ Մայնի Ֆրանկֆուրտում թուրք լրագրողների «կալանավորման» հետ կապված։ Ըստ DPA-ի՝ ձերբակալվածներ չկան, սակայն խուզարկություններ են կատարվել կասկածյալների բնակարաններում։ Առգրավվել են տեխնիկական միջոցներ և «այլ ապացույցներ»։
Գերմանական կողմը պնդում է, որ կասկածյալները 2022 թվականի վերջին տեղեկություն են տարածել Թուրքիայի նախագահ Ռեջեփ Թայիփ Էրդողանի քննադատների բնակության վայրի մասին։
Իրենց հերթին՝ Թուրքիայի իշխանությունները Գերմանիան անվանել են երկիր, որը պաշտպանում է «մամուլի ազատությունը՝ երկակի ստանդարտների դրսևորմամբ»։