«Իրանը կարող է լքել վեցնյակի հետ բանակցությունները, եթե բանակցության որևէ կողմ, բանակցություններից բացի այլ միջոցներով, շարունակի Իրանի Իսլամական Հանրապետությանը թելադրել իր կամքը»,- նման տեսակետ է հայտնել Իրանի իրավական և միջազգային հարաբերությունների հարցերով արտաքին գործերի նախարարի տեղակալ՝ Սեյյեդ Աբբաս Արաքչին, հաղորդում է Press TV-ը:
Իրանի պաշտոնյայի նման հայտարարությունն ըստ էության՝ պատասխան էր ԱՄՆ պետքարտուղար Ջոն Քերիի կողմից նախկինում արված հայտարարությանը, համաձայն որի՝ Վաշինգտոնը չի ցանկանում հերթական անգամ երկարաձգել Իրանի միջուկային ծրագրի շուրջ բանակցությունների վերջնաժամկետը:
Այդուամենայնիվ, ինչպես հաղորդում է նույն աղբյուրը, Աբբաս Արաքչին Ժնևում ԱՄՆ-ի և Իրանի միջև տեղի ունեցած երկկողմ բանակցությունները «օգտակար և կառուցողական» է անվանել և հավելել, որ բանակցություններում հետագա ջանքերը պետք է ուղղված լինեն՝ հասնելու այնպիսի որոշման, որը կբավարարի բանակցության բոլոր կողմերին:
Իրանի միջուկային ծրագրի շուրջ բանակցությունների հաջորդ փուլը նախատեսվում է փետրվար ամսվա վերջին: Նախօրեին ԱՄՆ պետքարտուղար՝ Ջոն Քերին, մեկնել էր Ժնև, որտեղ տեղի են ունեցել իր և Իրանի արտգործնախարար՝ Մոհամմադ Ջավադ Զարիֆի միջև երկօրյա բանակցությունները: