Ամերիկացի և իրանցի բանակցողներն առաջընթաց են արձանագրում իրանական միջուկային ծրագրի շուրջ տարվող բանակցություններում, թեև դեռ շատ աշխատանք պետք է տարվի բանակցությունները եզրափակելու համար: Ինչպես գրում է Al-Monitor-ը, փետրվարի 23-ին Ժնևում կայացած հանդիպումը կարծես բեկումնային պահ լինի վերջնական միջուկային համաձայնության հասնելու շուրջ ավելի քան մեկ տարի տևած բանակցություններում, որոնք արդեն 2 անգամ երկարաձգվել են: Բանակցողները վստահություն են հայտնել, որ քաղաքական համաձայնության հասնելու ճանապարհին են և առաջիկա շաբաթների ընթացքում կարող են համաձայնության գալ վերջնական միջուկային պայմանագրի գլխավոր տարրերի շուրջ:
Վերոնշյալ հանդիպմանը մասնակցել են ոչ միայն ԱՄՆ պետքարտուղար Ջոն Քերին և Իրանի ԱԳՆ ղեվարար Մուհամադ Ջավադ Զարիֆը, այլ նաև Իրանի Ատոմային էներգիայի կազմակերպության նախագահ Ալի Աքբար Սալեհին, ԱՄՆ էներգետիկայի նախարար Էռնեսթ Մոնիզը, ինչպես նաև Իրանի նախագահի Հասան Ռոհանիի եղբայրը՝ Հուսեյն Ֆեռեյդունը: «Շատ լուրջ, օգտակար և կառուցողական քննարկումներ են կայացել, մենք որոշակի առաջընթաց ենք գրանցել, սակայն դեռ երկար ճանապարհ ունենք անցնելու», - բանակցությունների ավարտից հետո լրագրողներին հայտնել է ԱՄՆ վարչակազմի պաշտոնյաներից մեկը:
Իր հերթին, Իրանի արտգործնախարարը իրանական Fars լրատվական գործակալությանն ասել է. «Մենք լուրջ բանակցություններ ենք ունեցել, հատկապես ամերիկացիների հետ: Սակայն դեռ երկար ճանապարհ կա վերջնական համաձայնության հասնելու համար»:
Al-Monitor-ի տվյալների համաձայն հնարավոր է, որ վերջին օրերին առաջընթաց է գրանցվել բանակցությունների ամենախնդրահարույց հարցերից մեկի՝ Իրանի միջուկային հարստացման կարողությունների չափի վերաբերյալ:
Նշենք, որ կողմերը փորձելու են Իրանի միջուկային ծրագրի շուրջ համապարփակ պայմանագրի քաղաքական հատվածը ավարտել մինչև մարտի վերջ, իսկ բոլոր տեխնիկական մանրամասները համաձայնեցնել մինչև հունիսի 30-ը: ԱՄՆ Կոնգրեսը սպառնում է նոր տնտեսական պատժամիջոցներ սահմանել Իրանի դեմ, եթե մինչև մարտի 24-ը շրջանակային համաձայնագիրը չկնքվի: