Վրաստանի խորհդարանի նախկին խոսնակ, «Միացյալ դեմոկրատական շարժում» կուսակցության ղեկավար Նինո Բուրջանաձեն վիրավորական է համարում, որ հայրենիքում հետախուզվող նախկին նախագահ Միխաիլ Սահակաշվիլիին հնարավորություն է տրվել ելույթ ունենալ ԱՄՆ Սենատի Եվրոպայի և տարածաշրջանային անվտանգության հարցերով ենթակոմիտեի լսումներին: Այս մասին հաղորդում է «Նովոստի-Գռուզիան»
Սահակաշվիլին, ով հանդիսանում է Ուկրաինայի նախագահ Պյոտր Պորոշենկոյի օգնականը և նախագահին կից գործող միջազգային խորհրդակցական խորհրդի ղեկավարը, ԱՄՆ Սենատում ելույթ է ունեցել մարտի 4-ին:
«Ինչպե՞ս հասկանալ այն հայտարարությունները, թե Արևմուտքը հարգում է Վրաստանի ինքնիշխանությունը: Վրաստանի ինքնիշխանությունը հարգելն առաջին հերթին նշանակում է, որ դու պետք է հարգես երկրի ղեկավարությանը և նրա կողմից ընդունված որոշումները: Իսկ այն անձը, ով հետախուզվում է իշխանությունների կողմից չպետք է ընդունվի որպես բարձրաստիճան ներկայացուցիչ երկրի բարձրագույն մարմիններում»,- հայտարարել Բուրջանաձեն երեքշաբթի կայացած բրիֆինգի ժամանակ:
Բուրջանաձեն միաժամանակ դիմել է Վրաստանում ԱՄՆ դեսպան Ռիչարդ Նորլանդին՝ հայտարարելով, որ «նման քայլերը չեն դիտվի որպես բարեկամական ժեստ վրացական ժողովրդի և վրացական պետության նկատմամբ»:
Վրաստանի գլխավոր դատախազությունը 2014թ-ին հեռակա կարգով Սահակաշվիլիին մեղադրանք է ներկայացրել մի քանի քրեական գործերի հիմքով՝ 5 միլիոն դոլար պետական միջոցների վատնում անձնական կարիքների համար, պաշտոնական լիազորությունների չարաշահում 2007թ-ի նոյեմբերի 7-ի ցույցի ցրման ժամանակ, պատգամավոր Վալերի Գելաշվիլիին ծեծի ենթարկելու և «Վրաստանի միացյալ բանկի» աշխատակից Սանդրո Գիրգվիլիանիի սպանության դեպքի հետ կապված: Նախկին նախագահի նկատմամբ հայտարարվել է ներպետական հետախուզում, և սկսվել է նրան միջազգային հետախուզում հայտարարելու գործընթացը: