ԱՄՆ Նևադա նահանգի նահանգապետ Բրայան Սանդովալը ապրիլի 19-26-ը հայտարարել է Հայոց ցեղասպանության զոհերի հիշատակի օրեր: Այս մասին փոխանցում է Ամերիկայի հայկական խորհուրդը:
Հայտարարության մեջ դատապարտվում են Օսմանյան կայսրությունում 1.5 մլն հայերի համակարգված սպանություններն ու տեղահանությունը՝ ընդգծելով հայ ժողովրդի ծանր կացությունը:
Հայտարարության մեջ ըստ արժանվույն է գնահատվում Նևադայի ամերիկահայ համայնքը՝ նշելով, որ բարգավաճող համայնքը նույնիսկ ծայրահեղ պայմաններում գոյատևման ու ինքնորոշման հպարտ հիշեցում է։
Ներկայացուցիչների պալատին և ԱՄՆ նախագահին կոչ է արվում ճանաչել հայերի նկատմամբ իրականացված ոճրագործությունը, բացի այդ՝ այն ևս մեկ անգամ վերահաստատում է Թուրքիայի պատասխանատվությունը՝ ճանաչելու Հայոց ցեղասպանության փաստերը: