Լիտվան, ամենայն հավանականությամբ, կհրաժարվի Գազպրոմի հետ նոր պայմանագիր կնքել: Այս մասին օրերս հայտարարել է Լիտվայի Lietuvos Energija պետական էներգետիկ կազմակերպության նախագահ Դալյուս Միսյունասը: «Հաշվի առնելով բոլոր հանգամանքները՝ Լիտվան չի կարող ռիսկի դիմել և Գազպրոմի հետ հաստատագրված գներով պայմանագիր կնքել»,- հայտարարել է Միսյունասը: Նա նշել է, որ Լիտվիան Գազպրոմի հետ լավագույն դեպքում կարող է կնքել միայն կարճաժամկետ պայմանագիր:
Նշենք, որ Լիտվայի իշխանությունները դեռևս 2014թ. վերջին հայտնել էին ռուսական գազից հրաժարվելու իրենց մտադրության մասին: 2014թ. վերջին Լիտվան կառուցել է գազի մատակարարման սեփական տերմինալ, ինչը թույլ կտա ապահովել գազի այլընտրանքային մատակարարում: Այս մասին հայտարարել էր Լիտվայի էներգետիկայի նախարար Ռոկաս Մասյուլիսը BBC-ին տված հարցազրույցի ժամանակ:
Նախորդ տարի Լիտվան ստորագրել է հնգամյա պայմանագիր նորվեգական Statoil կազմակերպության հետ տարեկան 540մլն խոր. մ գազի մատակարարման շուրջ: Այն կարող է ապահովել կենցաղում գազի օգտագործման կեսից ավելին: Արդեն այս տարվա փետրվարին ստորագրվել է համաձայնագիր ամերիկյան Cheniere Energy կազմակերպության հետ գազի մատակարարման շուրջ: