«Հայոց ցեղասպանությունը մարդկային մեծագույն ողբերգություն է: Չի կարելի ասել, որ դա հայերի հարցն է, ոչ, դա միջազգային խնդիր է, քանի որ հենց միջազգային հանրության անպատժելիությունը պատճառ դարձավ հետագայում նման ոճրագործությունների կրկնման համար», - «Արմենպրես»-ի հետ զրույցում ասել է France 2, Assafir և մի շարք այլ հայտնի լրատվականների թղթակից, արաբ լրագրող Թալալ Խրայիսը:
Դեռևս մանուկ տարիներից հայերի օգնությունն ու մեծահոգությունը սեփական անձի վրա զգացած լրագրողը վստահություն է հայտնել, որ Ցեղասպանության 100-րդ տարելիցը լավ հնարավորություն է միջազգային հանրության համար՝ ճանաչելու Հայոց ցեղասպանությունը, որպեսզի այլևս երբեք նման հանցագործություններ չկրկնվեն: Լրագրողի կարծիքով՝ մի օր Թուրքիան ևս կճանաչի պատմական այս ճշմարտությունը և այս հարցում մեծ գործ ունի անելու Թուրքիայի երիտասարդությունը:
Որպես ռազմական լրագրող, ով վերջին տարիներին շատ է եղել Սիրիայում և Լիբանանում, Թալալ Խրայիսը խոսեց նաև ԻԼԻՊ-ի և Սիրիայում տիրող իրավիճակի մասին՝ հստակ համոզմունք հայտնելով, որ Թուրքիան ուղղակիորեն աջակցում է ԻԼԻՊ-ին: «Ես եղել եմ այնտեղ, ամեն անգամ, երբ իսլամիստները դժվարություններ են ունենում, թուրքական բանակն աջակցում է նրանց», - «Արմենպրես»-ի փոխանցմամբ՝ նշել է արաբ լրագրողը: