Ադրբեջանի կողմից շփման գծում մշտական սադրանքներն ու պատերազմի վերսկսման շուրջ մշտական սպառնալիքները հեռացնում են հակամարտության վերջնական կարգավորման հեռանկարը: Այդ մասին «Արարատի ստորոտին» միջազգային մեդիաֆորումի եզրափակիչ օրն ունեցած ելույթում հայտարարել է ԼՂՀ ԱԳ նախարար Կարեն Միրզոյանը, հաղորդում է NEWS.am-ը:
Ի տարբերություն Ադրբեջանի՝ Արցախի Հանրապետությունում ղարաբաղյան հակամարտության խաղաղ կարգավորմանն այլընտրանք չեն տեսնում, հայտարարել է նախարարը: Նա հավելել է, որ Արցախյան կողմը պատրաստ է քննարկել հարցերի ամբողջական համալիրը։ «Մեր սկզբունքային դիրքորոշումը հետևյալն է. խնդրի կարգավորումը պետք է հիմնված լինի խաղաղության, իրավահավասարության և ինքնորոշման իրավունքի հարգման վրա»,- ընդգծել է Միրզոյանը:
Հակամարտության վերջնական կարգավորման համար, ըստ նախարարի, անհրաժեշտ է բոլոր ուժերը կենտրոնացնել երկու անկախ պետությունների՝ Լեռնային Ղարաբաղի Հանրապետության և Ադրբեջանի Հանրապետության խաղաղ գոյակցության համար համապատասխան ջանքերի և պայմանների մշակման ուղղությամբ:
«Ակնհայտ է, որ Լեռնային Ղարաբաղի Հանրապետության միջազգային ճանաչումը նաև կապահովի խաղաղության գործընթացի անշրջելիությունը և ազդանշան կդառնա ուժի կիրառման և պաշտոնական Բաքվի կողմից ուժի սպառնալիքների անթույլատրելիության մասին»,- նշել է Կարեն Միրզոյանը: