Թուրքական բանտում գտնվող քրդական առաջնորդ Աբդուլլահ Օջալանը Նովրուզի կապակցությամբ շնորհավորական ուղերձ է հղել քուրդ ժողովրդին՝ կրկին կոչ անելով իր կողմնակիցներին դադարեցնել անկախության համար մղվող զինված պայքարը Թուրքիայում:
Ուղերձում քրդական առաջնորդը հորդորել է Քրդական աշխատավորական կուսակցության նիստ գումարել թուրքական իշխանությունների դեմ պայքարը դադարեցնելու մասին որոշում ընդունելու համար:
Ավելացնենք, որ 2013թ. Օջալանի կողմից հայտարարված հրադադարը պահպանվում է մինչ օրս՝ չնայած կողմերի միջև առկա անվստահությանը: Վերջերս Թուրքիայի նախագահ Էրդողանը բարկացրել էր քրդերին՝ ասելով, որ Թուրքիայում երբեք էլ չի եղել քրդական հարց:
Սպասվում է, որ առաջիկա ամիսների ընթացքում քրդական հարցը էլ ավելի ինտենսիվորեն կշահարկվի թուրքական քաղաքական շրջանակների կողմից, քանի որ այն կարող է հունիսին Թուրքիայում կայանալիք խորհրդարանական ընտրությունների ժամանակ Էրդողանի կուսակցության համար զգալի ձայներ ապահովել կամ հակառակը: