Ձեզ ենք ներկայացնում «Արմեդիա» ՏՎԳ հարցազրույցը Սրբազան Ալթանի հետ Տաշի Չոյլինգ վանքից (Մոնղոլիա): Այն իրականացվել է Համաշխարհային և ավանդական կրոնների առաջնորդների 5-րդ համագումարի ժամանակ Աստանայում (Ղազախստան) «Հայաստան-Ղազախստան. համագործակցության հարթակներ» ծրագրի շրջանակներում, որն իրականացվում է Հայաստանում Ղազախստանի դեսպանատան հետ համատեղ:
Մոնղոլիայի բուդդիստները մասնակցում են Համաշխարհային և ավանդական կրոնների առաջնորդների համագումարին հինգերորդ անգամ, և հենց սկզբից էլ մենք ընդունել ենք այս համագումարի առաքելությունը, նպատակը, քանի որ այն տանում է միասնականության: Այստեղ ոչ միայն կրոնական առաջնորդները, այլև քաղաքական առաջնորդներն աշխատում են միասին խաղաղության հասնելու համար, կարեկցանքի վրա հիմնված հանդուրժողականության զարգացման վրա: Ահա սա է պատճառը, որ մենք գալիս ենք այս համագումարին:
Բուդդայի ուսմունքի համաձայն, մենք բոլորս նույնն ենք՝ անկախ ազգից ու կրոնից, մենք բոլորս մարդկային էակներ ենք և ունենք միևնույն նպատակը՝ միասին ապրել խաղաղության մեջ: Մենք կողմ ենք կարեկցանքին, խաղաղ գոյակցությանը: Բուդդան ասում էր. «Ձեր մեջ իսկական սեր զարգացրեք»: Իսկ իսկական սեր նշանակում է՝ զարգացնել կարեկցանքի վրա հիմնված համբերություն: Աշխարհում չպետք է լինի վիճաբանություն և թյուրըմբռնում: Զարգացրեք ձեր մեջ կարեկցանք, սեր և կհասնեք լուսավորության: