ԱՄՆ-ում անհրաժեշտ են համարում միջոցներ ձեռնարկել Իրանի դեմ՝ բալիստիկ հրթիռի արձակման պատճառով։ Այդ հարցը կբարձրացվի ՄԱԿ ԱԽ-ում, հայտնում է ՌԻԱ Նովոստին՝ հղում կատարելով ԱՄՆ պետդեպարտամենտի պաշտոնական ներկայացուցիչ Մարկ Տոների խոսքերին։
«Մոտակա օրերին մենք հարցը կբարձրացնենք ՄԱԿ Անվտանգության Խորհրդում՝ պատասխան պահանջելով։ Չեմ կարող հայտարարել, որ մենք անմիջապես միջոցներ կձեռնարկենք, չնայած ակնհայտորեն ունենք դրա իրավունքը, բայց մինչ այդ պետք է հարցը բարձրացնենք ՄԱԿ ԱԽ-ում»,- ասել է Տոները։
Նախօրեին Իրանի պաշտպանության նախարար Հոսսեյն Դեպգանը հայտարարել է հեռահար բալիստիկ հրթիռի հաջող փորձարկման մասին։ ԱՄՆ-ն հայտարարել է, որ այդ փորձարկումը խախտում է ՄԱԿ բանաձևերը։
ՄԱԿ ԱԽ 1929 բանաձևը նախատեսում է, որ Իրանը չի կարող մասնակցել բալիստիկ հրթիռների հետ կապ ունեցող որևէ միջոցառման։