ՀՀ խորհրդարանը մայիսի 17-ին 2-րդ ընթերցմամբ ընդունեց Ընտրական օրենսգրքի նախագիծը։ Կողմ է քվեարկել 94 պատգամավոր, դեմ՝ 18-ը, ևս 4-ը ձեռնպահ են մնացել, փոխանցում է News-ը:
Առաջին և երկրորդ ընթերցումների միջև նախագծում մի շարք փոփոխություններ են կատարվել։
Ընտրական օրենսգրքի նախագծի համաձայն, խորհրդարանական ընտրությունները միակ համապետական ընտրություններն են: Դրանք տեղի են ունենալու բացառապես համամասնական ընտրակարգով (կուսակցական ցուցակներով): Եթե որևէ կուսակցություն չի ստանում բացարձակ մեծամասնություն, և երեք օրվա ընթացքում չի հաջողվում կոալիցիա ձևավորել, ապա նախագահական ընտրությունների նման առաջին երկու տեղը զբաղեցրած ուժերի մասնակցությամբ տեղի է ունենում ընտրությունների երկրորդ փուլ:
Ընդ որում, առաջին փուլից հետո խորհրդարան անցած կուսակցությունները կարող են միավորվել երկրորդ տեղը գրաված ուժի հետ և կոալիցիա կազմել: Հաղթող ուժը (լինի առաջին, թե երկրորդ փուլի արդյունքում) ստանում է մանդատների առնվազն 54 տոկոսը, սակայն չի կարող ունենալ մանդատների թիվի 2/3-ից ավելին: Իսկ եթե ընտրությունների առաջին փուլում որևէ ուժ ստացել է մանդատների 2/3-ից ավելին, ապա այդ դեպքում մանդատներ են բաշխվում մյուս ուժերին, որպեսզի առաջատար ուժի տեսակարար կշիռը նվազի 2/3-ից:
Բացի այդ, երաշխավորված տեղեր են հատկացվելու առավել խոշոր 4 ազգային փոքրամասնություններին:
Նախատեսված է նաև էլեկտրոնային ցուցակների ներդրում, իսկ դիվանագետների և արտերկրում գործող հայկական ընկերությունների աշխատակիցների համար կգործի էլեկտրոնային քվեարկություն: