Ադրբեջանը շարունակում է բացասական վիճակագրություն ցուցադրել: Ըստ այդ երկրի վիճակագրական ծառայության տվյալների, տարվա սկզբից մինչ օրս ադրբեջանական տնտեսության անկումը հասել է 3.1 %-ի:
Ոչ միայն տնտեսական աճի անկումն, այլև ՀՆԱ կառուցվածքը բավական խոսուն են Ադրբեջանի տնտեսության մասով: Պատկերն այսպիսին է. ադրբեջանական համախառն ներքին արդյունքը կազմել է 38,028 մլրդ մանաթ`(23,08 մլրդ ԱՄՆ դոլար), ընդ որում այդ երկրի վիճակագրական ծառայության կողմից, հավանաբար, ոչ պատահականորեն, հատուկ շեշտվում է, որ նշված գումարում ոչ նավթային ՀՆԱ-ն կազմել է՝ 25 մլրդ մանաթ, կամ որ նույնն է՝ 15,6 մլրդ դոլար:
Ի՞նչ է սա նշանակում: Հասկանալի է, որ ադրբեջանական իշխանությունների համար ցանկալի է իրենց տնտեսության, մեղմ ասած, վատթար վիճակի ողջ մեղքն ու պատասխանատվությունը գցել նավթի համաշխարհային շուկայի անկումների վրա՝ միաժամանակ ամեն առիթով նշելով (տարբեր հանդիսությունների ժամանակ, մինչև անգամ նախագահի մակարդակով), որ Ադրբեջանում մեծ է տնտեսության դիվերսիֆիկացիայի մակարդակը: Եթե փորձենք համադրել Ադրբեջանի որդեգրած այդ քաղաքականությունն ու վերոնշյալ վիճակագրությունը, կստացվի, Ադրբեջանն իբրև թե կարողանում է ապահովել Համախառն ներքին արդյունք՝ մեծամասամբ ոչ նավթային ապրանքների հաշվին: Ինչ խոսք, քաղաքական հետագիծն ակնհայտորեն նշմարվում է: Սակայն այդպիսով, ադրբեջանական իշխանությունները կամա, թե ակամա բացահայտում են իրենց նախորդ ստերը:
Խոսքը որոշ նրբությունների մասին է: Մասնավորապես, առաջին հերթին այն, որ նախորդ տարվա համեմատ վերոնշյալ 3.1 %-անոց անկումը պայմանավորված է շինարարության ոլորտում գրանցած անկումով, ինչը բացահայտում է, որ նախորդ տարվա աճը Բաքվում անցկացված Եվրոպական խաղերի առաջացրած «փուչիկների» հաշվին էր: Հիշեցնելու կարգով նշենք, որ անցյալ ողջ տարին պաշտոնական Բաքուն համառորեն պնդում էր, որ Ադրբեջանն այնքան հզոր երկիր է, որ անգամ նավթի համաշխարհային ճգնաժամը չի ազդում իր վրա, և այն շարունակում է զարգանալ:
Մյուս նրբությունը, որի մասին խոսում է ՀՆԱ ցուցանիշների վիճակագրությունն, այն է, որ իրականում ոչ մի տնտեսական դիվերսիֆիկացիա չկա, կամ այն շատ ցածր մակարդակի վրա է, քանի որ որքան էլ հունվար-օգոստոս ամիսներին Ադրբեջանի ՀՆԱ կառուցվածքում մեծ լինի ոչ նավթային արդյունքի մասնաբաժինը, ՀՆԱ ցուցանիշն անկումային է: Ուստի ոչ նավթային տնտեսությունն Ադրբեջանում այդքան էլ ծաղկուն չէ, ինչն անգամ սովորական դպրոցի բացման արարողության ժամանակ իր հանրությանն է ուզում համոզել այդ երկրի նախագահ Ալիևը: