Ապրիլի 2-ին «Եռաբլուր» պանթեոնում անդրադառնալով Ապրիլյան պատերազմից քաղած դասերին պաշտպանության նախարար Վիգեն Սարգսյանն ասել է.
«Ամենակարևոր բանը, որ այս տարիների ընթացքում տեղի է ունեցել, չեմ կապում Ապրիլյան պատերազմի հետ, որպես հասարակության էվոլուցիոն գործընթաց, գիտակցել ենք, որ երկրի պաշտպանությունը չի կարող լինել հասարակության մի մասի ուսերին դրված, կամ կտրված լինել պետության կենսակերպից, առհասարակ։ Մենք հասկացել ենք, որ այն ողջ պետական համակարգի կենսակերպ է, և դա է մեր առանցքը հետագա քայլերի բոլոր այն ծրագրերի, որ կյանքի կկոչենք ու որպես ազգ–բանակ պատրաստ լինենք պաշտպանելու երկիրը»,– հայտնում է NEWS.am-ը:
Նա հավելել է, որ պայքարը չի սկսվում և ավարտվում Լեռնային Ղարաբաղում։
«Մեր պայքարը ո՛չ սկսվում, ո՛չ էլ ավարտվում է Ղարաբաղում, մենք չենք կարող ուժերը հաշվարկել երկարության գիծ պահելու խնդրով։ Որպես հասարակություն՝ խնդիր ունենք արագ զարգանալու ու այն պաշտպանելու համար»,– ասել է Սարգսյանը։