Վատիկանում տեղի է ունեցել «Տիեզերական եկեղեցու վարդապետ» հռչակված Աստվածաշնորհ Սուրբ Գրիգոր Նարեկացու արձանի բացման արարողությանը: Բացումը կատարել է Սուրբ Աթոռում Հայաստանի Հանրապետության արտակարգ և լիազոր դեսպան Միքայել Մինասյանը: Վատիկանի պարտեզներում արձանի հանդիսավոր բացումից հետո տեղի է ունեցել էկումենիկ արարողություն` Հռոմի Սրբազան Քահանայապետ Ֆրանցիսկոս Պապի, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի և Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսի մասնակցությամբ:
Հռոմի Ֆրանցիսկոս պապը հանդիսավոր արարողության ավարտին գլուխ խոնարհեց արձանի առաջ:
Վատիկանը գտնվում է ամբողջ աշխարհի քրիստոնյաների ուշադրության կենտրոնում և Հռոմի պապի կողմից Վատիկանի պարտեզներում Նարեկացու արձանի օծումը նշանակալից իրադարձություն է: Այն կարևոր է ոչ միայն Հայ Առաքելական և Կաթոլիկ եկեղեցիների միջև հարաբերությունների տեսանկյունից, որոնք, ի դեպ, էլ ավելի ամրապնդվեցին Ֆրանցիսկոս պապի՝ Հայաստան՝ առաջին քրիստոնյա երկիր, այցից հետո: Արձանի բացումը կարևոր է նաև աշխարհին Գրիգոր Նարեկացու և ընդհանրապես հայ մշակութային ժառանգության հետ ծանոթացնելու առումով:
Հիշեցնենք, 2015 թվականի ապրիլին ապրիլին Վատիկանի Սուրբ Պետրոսի տաճարում Հայոց ցեղասպանության 100-րդ տարելիցին նվիրված պատարագի ժամանակ Հռոմի Ֆրանցիսկոս պապը Գրիգոր Նարեկացուն հռչակեց Տիեզերական եկեղեցու վարդապետ: Այսպիսով, 2016 թվականի հունիսին Հռոմի պապ Ֆրանցիսկոսի՝ Հայաստան կատարած այցի շրջանակներում նախագահ Սերժ Սարգսյանը Սրբազան Քահանայապետին էր նվիրել Գրիգոր Նարեկացու արձանի մանրակերտը՝ հույս հայտնելով, որ դրա մեծ տարբերակն ապագայում կտեղադրվի Վատիկանում: Հռոմի Պապը տվել էր իր համաձայնությունը:
Ստեղծագործության հեղինակը քանդակագործ Դավիթ Երևանցին է։ Բրոնզե արձանը պատրաստվել է Չեխիայի Հանրապետության ձուլարաններից մեկում՝ Սուրբ Աթոռում Հայաստանի Հանրապետության արտակարգ և լիազոր դեսպան Միքայել Մինասյանի և Արթուր Ջանիբեկյանի ֆինանսական աջակցության։ Արձանի երկու օրինակ է ձուլվել, որոնցից մեկը Վատիկանի պարտեզների, իսկ մյուսը՝ Էջմիածնի վեհարանի համար։