Կանադայի վարչապետ Ջասթին Թրյուդոն պաշտոնապես ներողություն է խնդրել նացիստական Գերմանիայից 1939 թվականին Սենթ-Լուիս նավով Կանադա ժամանած հրեաներին չընդունելու համար:
«Այսօր ես եկա Համայնքների պալատ, որպեսզի ուշացած ներողությունս հայտնեմ այն հրեա փախստականներին, որոնց Կանադան երես է թեքել: Ներողություն խնդրելով` ես ես անկեղծորեն հույս ունեմ, որ մենք կկարողանանք լույս սփռել մեր պատմության այդ ցավոտ գլխին և ապահովել այն, որ այդ դասը երբեք չմոռացվի: Հակասեմականությունը, քսենոֆոբիան և ատելությունը տեղ չունեն Կանադայում կամ ամբողջ աշխարհում», - ասել է Կանադայի վարչապետը:
930 հրեա փախստականներ 1939 թվականի մայիսին «Սենտ Լուիս» նավով Գերմանիայից ուղևորվել են Կուբա` խուսափելու նացիստական հետապնդումներից: Նրանք հույս են ունեցել անվտանգ վայրում սպասել ամերիկյան վիզա ստանալու իրենց հերթին, սակայն Կուբան, մի շարք լատինաամերիկյան երկրներ, ԱՄՆ-ը և Կանադան հրաժարվել են ընդունել նրանց և նավը հետ է գնացել Եվրոպա: Ուղևորներին հաջողվել է ապաստան ստանալ Մեծ Բրիտանիայում, Ֆրանսիայում, Բելգիայում և Հոլանդիայում: