ՀՀ ԱԺ նախագահը տեղեկացնում է, որ ՀՀ գլխավոր դատախազը դիմել է ԱԺ՝ ՀՀԿ խմբակցության պատգամավոր, Բնապահպանության նախկին նախարար Արամ Հարությունյանին անձեռնմխելիությունից զրկելու միջնորդությամբ։ Արա Բաբլոյանի անունից համապատասխան հայտարարություն է տարածվել։
«Հաշվի առնելով «Ազգային ժողովի կանոնակարգ» Հայաստանի Հանրապետության սահմանադրական օրենքի 108-րդ հոդվածի 1-ին մասի պահանջը հայտարարում եմ, որ Հայաստանի Հանրապետության գլխավոր դատախազ Արթուր Դավթյանը միջնորդություններ է ներկայացրել Հայաստանի Հանրապետության Ազգային ժողով՝ Հայաստանի Հանրապետության Ազգային ժողովի պատգամավոր Արամ Խաչիկի Հարությունյանի նկատմամբ քրեական հետապնդում հարուցելուն, ինչպես նաև նրա նկատմամբ կալանավորումը որպես խափանման միջոց կիրառելուն համաձայնություն տալու վերաբերյալ»,-նշված է ՀՀ ԱԺ նախագահ Արա Բաբլոյանի հայտարարության մեջ: