Համաշխարհային երաժշտական մշակույթի զարգացման գործում ունեցած հսկայական ավանդի համար BraVo մրցանակաբաշխության ոսկե արձանիկ է շնորհվել ֆրանսահայ շանսոնյե Շառլ Ազնավուրին: Այս մասին գրում է armtimes-ը:
Մրցանակաբաշխությունը տեղի է ունեցել Մոսկվայի Կրեմլի պալատում, հայտնում է:
«Նրա արվեստը ողջ է, նրա երաժշտությունը մարդկանց հիշողության մեջ կմնա հավերժ և երկար-երկար տարիներ կլուսավորի դեռ բազմաթիվ սերունդների», - ասել է արարողության հաղորդավար Ֆիլիպ Կիրկորովը:
Նա նշել է, որ այս մրցանակով հարգանքի տուրք է մատուցվում յուրատեսակ, զարմանահրաշ արտիստի հիշատակին: Ոսկե արձանիկը կփոխանցվի Ազնավուրի ընտանիքին:
Ազնավուրի՝ Համաշխարհային ճանաչում ստացած La vie d"amour երգը ռուսերեն ու ֆրանսերեն տարբերակներով կատարել է Թամարա Գվարցետելին:
BraVo մրցանակաբաշխությունն անցկացվում է երկրորդ անգամ: Այն կոչված է ընդգծելու արտիստների նվաճումները՝ դասական և այլ ժանրի երաժշտության ոլորտում:
Շառլ Ազնավուրը ծնվել է Փարիզում՝ 1924թ․-ի մայիսի 22-ին հայ գաղթականների ընտանիքում։ Նա CNN-ի եւ Times ամսագրի տվյալներով ճանաչվել է դարի լավագույն կատարող։ 70 տարվա կարիերայի ընթացքում վաճառվել է նրա ձայնասկավառակների 100 միլիոն օրինակ, գրվել է 1,2 հազար երգ, խաղացվել է 80 դերեր, թողարկվել է 294 ալբոմ եւ 94 երկրներում տեղի է ունեցել ավելի քան հազար համերգ։