Պենտագոնի ղեկավար Մարկ Էսփերը կիրակի՝ հոկտեմբերի 20-ին, ժամանել է Աֆղանստան: Սա Էսփերի առաջին այցն է պաշտպանության նախարարի պաշտոնում և նպատակ է հետապնդում վերսկսել բանակցություններն իսլամական «Թալիբան» շարժման հետ:
«Նպատակն է ունենալ խաղաղ համաձայնագիր, ինչ-որ պահի՝ քաղաքական համաձայնագիր, ինչը լավագույն լուծումն է»,- հայտարարել է Էսփերն իր հետ ուղևորված լրագրողներին:
Բանակցությունները, որ շուրջ մեկ տարի է ընթանում են ԱՄՆ-ի և իսլամական «Թալիբան» շարժման միջև, ընթացիկ տարվա սեպտեմբերի սկզբին հայտնվեցին խզման վտանգի տակ: Պլանավորված բանակցությունները չեղարկելու անսպասելի որոշում էր կայացրել ԱՄՆ նախագահ Դոնալդ Թրամփը՝ կապված Քաբուլի դիվանագիտական թաղամասում իրականացրած պայթյունի հետ, որի արդյունքում զոհվել էր ամերիկացի զինծառայող: Պայթյունի պատասխանատվությունը ստանձնել էր «Թալիբան»-ը: ԱՄՆ-ի ղեկավարի հետ բանակցություններից օրեր առաջ նման քայլի դիմելը Թրամփը որակել էր՝ որպես «բանակցություններում կեղծ առավելություն ձեռք բերելու» փորձ և չեղարկել դրանք: Ի դեպ, մինչ այդ արդեն կար թալիբների հետ նախապես համաձայնեցրած փաստաթուղթ, որը դեռ կարիք ուներ վերջնական համաձայնեցման և լուրջ հիմքեր էր տալիս ակնկալելու, որ Աֆղանստանում շուրջ 18 տարի շարունակվող պատերազմը կարող էր վերջապես ավարտվել: Այժմ Մարկ Էսփերի այցով ԱՄՆ-ն հերթական քայլն է անում՝ վերականգնելու եղած վիճակը և վերսկսելու բանակցությունները:
Թալիբներն ԱՄՆ-ից պահանջում են դուրս բերել զորքերն Աֆղանստանից, ինչին ի պատասխան պաշտոնական Վաշինգտոնը պահանջում է «Թալիբան»-ից անվտանգության կայուն երաշխիքներ, ինչպես նաև կապերի խզում «Ալ-Քաիդա»-ի հետ և ուղիղ երկխոսություն «Թալիբան»-ի և պաշտոնական Քաբուլի միջև, որին թալիբները համարում են Վաշինգտոնի դրածո իշխանություն և հրաժարվում բանակցելուց: Եվ միայն այս պահանջների կատարումից հետո Թրամփը խոստանում է մասնակիորեն բավարարել թալիբների՝ ամերիկյան զորքերը դուրս բերելու պահանջը. օգոստոսի 29-ին Թրամփը հայտարարեց, որ մտադիր է գրեթե կրկնակի կրճատել Աֆղանստանում գտնվող իր զորախումբը՝ 14000-ից հասցնելով 8600-ի՝ հավելելով, որ անգամ թալիբների հետ վերջնական համաձայնագրի ստորագրման պարագայում չի պատրաստվում ամբողջ զորքը դուրս բերել Աֆղանստանից: