Հայաստանը Ատոմային էլեկտրակայանի երկրորդ էներգաբլոկի արդիականացման աշխատանքների համար վարկի օգտագործման ժամկետի երկարացման համաձայնություն է ստացել Ռուսաստանի ֆինանսների նախարարությունից:
«Արմենպրես»-ի հաղորդմամբ՝ այս մասին ԱԷԿ-ում Հայաստանում Ռուսաստանի դեսպան Սերգեյ Կոպիրկինի հետ շրջայցից հետո լրագրողների հետ զրույցում ասել է ՀՀ տարածքային կառավարման և ենթակառուցվածքների նախարար Սուրեն Պապիկյանը:
«Այս տարվա ընթացքում քննարկվում էր վարկի երկարաձգման խնդիրը: Այս պահին մենք ունենք փոխհամաձայնություն, Ռուսաստանի Դաշնության ֆինանսների նախարարության կողմից արդեն իսկ երկարացման համաձայնություն ստացվել է: Եվ կառավարության առաջիկա նիստին կքննարկվի այս հարցը: Այսինքն՝ մնացել են միայն իրավական գործողությունները, որ պետք է կատարվեն երկու կողմից»,-ասել է Պապիկյանը:
Անդրադառնալով պատճառներին՝ Պապիկյանը նշել է, որ աշխատանքները՝ բավականին ծանր ու կարևոր են: Նախարարը նկատել է, որ հաշվի առնելով ատոմակայանի և անվտանգության խնդիրների կարևորությունը, շտապողականությունը երբեմն կարող է վնաս հասցնել աշխատանքին: Եվ դրա արդյունքում էլ անհրաժեշտություն է առաջացել որոշ աշխատանքների ժամկետի երկարաձգում: Նախատեսվում է վարկի օգտագործման ժամկետի երկարացում՝ մինչև 2021 թվականի վերջ: