ՎԶԵԲ-ը Հայաստանին 10.6 միլիոն վարկ կտրամադրի` Մեղրիում նոր անցակետի կառուցման համար
Վերակառուցման և զարգացման եվրոպական բանկը պատրաստվում է Հայաստանին 10.6 միլիոն եվրո վարկ տրամադրել` Մեղրիում Իրանի հետ սահմանին նոր մաքսակետի կառուցման համար: Այս մասին Ազգային ժողովում Ֆինանսավարկային և բյուջետային հարցերի մշտական խորհրդարանական հանձնաժողովի նիստին Հայաստանի և Վերակառուցման և զարգացման եվրոպական բանկի միջև 2020 թվականի փետրվարի 7-ին ստորագրված «Մեղրիի անցակետի համար վարկի տրամադրման մասին» համաձայնագրի վավերացման հարցի քննարկման ժամանակ ասաց Հայաստանի պետական եկամուտների կոմիտեի փոխնախագահ Միքայել Փաշայանը, փոխանցում է News.am-ը:
Ենթադրվում է, որ անցակետի տարածքը 6.5-ից կդառնա 8.6 հա: Թողունակության հնարավորություններն օրական 300-ից կդառնան 900 ավտոմեքենա: Սպասվում է, որ շինարարությունը կավարտվի 2023 թվականին: Միջազգային մակարդակի կառավարման մեխանիզմներ կներդրվեն:
Պաշտոնյայի խոսքով` անցակետի կառուցումից հետո այն փաստացի կվերածվի լիարժեք գործող մաքսային մարմնի, որտեղ նաև արդյունավետ պայքար հնարավոր կլինի մաքսանենգության դեմ: Վարկը կտրամադրվի 15 տարի ժամկետով (եռամյա առավելություններով) լողացող տոկոսադրույքով` 6-ամսյա Euribor + 1 տոկոս: Ընդ որում, ըստ վերջին 6 ամիսների ցուցանիշների դրույքաչափը 1.78 տոկոս է: Բացի այդ, անցակետում ապրանքների լաբորատոր վերլուծության նոր սարքեր, ապրանքների, այդ թվում` ուղևորների ձեռքի ուղեբեռի զննման, ինչպես նաև մարդկանց սկանավորման համար սկաներներ կտեղադրվեն: «Անցակետի հնարավորությունները ուժեղացնել հարկավոր է` հաշվի առնելով այն փաստը, որ 2016-ի օգոստոսից Հայաստանի և Իրանի միջև առանց վիզայի ռեժիմ է գործում, որը ժամանակավորապես չեղարկվել է կորոնավիրուսի համավարակի պատճառով: Եթե 2017-ի հունիս-հուլիս ամիսներին մոտ 2000 բեռնատար է հատել սահմանը, ապա 2019-ի նույն ամիսներին` շուրջ 4.150 մարդ: Ուղևորների թիվը կրկնապատկվել է` 55-ից հասնելով 124 հազարի: Չնայած կորոնավիրուսի պատճառով սահմանն այժմ փակ է ուղևորների համար, դրա բացումից հետո երկու բարեկամ երկրների միջև ուղևորությունները և առևտուրն ամբողջությամբ կվերսկսվեն»,- ընդգծեց Փաշայանը:
Քննարկումներից հետո խորհրդարանական հանձնաժողովը դրական եզրակացություն տվեց այս նախաձեռնությանը: