«Հայացք» վերլուծական կենտրոնի փորձագետ Լիլիա Ամիրխանյանը ֆեյսբուքի իր էջում անդրադարձել է Կառավարության նիստում բյուջետային եկամուտների աճի մասին քննարկմանը: Նա գրել է.
«Տնտեսության վերականգնման մասին դրական լուրեր ձևավորելու չնահանջող համառությունը
Կառավարության նիստին կրկին թիրախավորվեց բյուջետային եկամուտների, ՀԴՄ-ներով և այլ հաշվարկային փաստաթղթերով գործարքների ավելացումը (ընթացիկ տարվա մարտը նախորդ տարվա նույն ժամանակահատվածի համեմատ):
Նախ հարց է՝ կհաստատվի՞ արդյոք այս լուրը պետական վիճակագրության կողմից: Պարզապես հիշեցնեմ, որ փետրվարին Կառավարության նիստում առաջին 15 օրերի ՀԴՄ-ների գործարքների ավելացումը հետագայում պաշտոնական վիճակագրության կողմից փաստացի հերքվեց՝ այդ ժամանակահատվածում առևտրաշրջանառությունում գրանցված 11,3 % անկումով:
Բայց մյուս կողմից, աբսուրդ է այս տարվա մարտը նախորդ տարվա մարտի հետ համեմատելու արդյունքում գրանցված աճը վերականգնման հիմք համարելը՝ հաշվի առնելով, որ նախորդ տարվա մարտ ամիսը հակահամաճարակային գործողությունների արդյունքում տնտեսական լոքդաունի շրջան էր և բախվել էր բյուջետային եկամուտների հավաքագրման լրջագույն խնդրի հետ:
Իրականում տնտեսական գործընթացների որոշակի վերականգնում ունենք և դա դրականորեն կածանցվի նաև վիճակագրությունների վրա, բայց տնտեսական աճի դեռևս պահպանվող բացասական ցուցանիշի պայմաններում վաղ է հետճգնաժամային փուլի մասին խոսելու համար»: